मुंबई: मुंबईतील कुर्ला परिसरातून एका वर्षाच्या चिमुकल्याचे अपहरण करून त्याला डोंबिवलीत सोडून दिल्याची धक्कादायक घटना समोर आली आहे. कौटुंबिक वादातून ही घटना घडल्याचा प्राथमिक तपासात संशय व्यक्त करण्यात आला असून, पोलिसांनी बाळाची सुखरूप सुटका केली आहे. या प्रकरणातील आरोपीचा शोध सुरू आहे.
पोलिसांनी दिलेल्या माहितीनुसार, कुर्ला परिसरातील श्यामसुंदर कांबळे यांच्या एका वर्षाच्या मुलाचे अचानक अपहरण झाल्याने कुटुंबीयांमध्ये एकच खळबळ उडाली. बराच वेळ शोध घेऊनही बाळाचा पत्ता न लागल्याने वडिलांनी तातडीने पोलिस ठाण्यात तक्रार दाखल केली.
तक्रार मिळताच पोलिसांनी तपासाची चक्रे वेगाने फिरवत परिसरातील 150 हून अधिक सीसीटीव्ही कॅमेऱ्यांचे फुटेज तपासले. या तपासादरम्यान बाळाला घेऊन जाणारा तरुण दिसून आला. चौकशीत तो श्यामसुंदर कांबळे यांचा मूकबधिर भाचा अमन सकट असल्याचे निष्पन्न झाले.
प्राथमिक माहितीनुसार, लग्नाला विरोध करून सोयरिक मोडल्याच्या रागातून अमनने मामाला धडा शिकवण्याच्या उद्देशाने हे अपहरण केल्याचा आरोप आहे. अपहरणानंतर त्याने चिमुकल्याला डोंबिवलीतील कोपर परिसरातील एका बंद रिक्षामध्ये सोडून तेथून पलायन केले.
दरम्यान, विष्णूनगर पोलिसांना संबंधित बाळ सुरक्षित अवस्थेत आढळून आले. बाळाचा फोटो सोशल मीडियावर प्रसारित झाल्यानंतर कुर्ल्यातील अपहरण प्रकरणाशी त्याचा संबंध असल्याचे स्पष्ट झाले. त्यानंतर बाळाची ओळख पटवून त्याला कुटुंबीयांच्या ताब्यात देण्याची प्रक्रिया सुरू करण्यात आली.
सध्या बाळावर शास्त्रीनगर रुग्णालयात उपचार सुरू असून त्याची प्रकृती स्थिर असल्याची माहिती आहे. या प्रकरणातील आरोपी अमन सकट याचा शोध घेण्यासाठी पोलिसांनी विशेष पथके नियुक्त केली असून, पुढील तपास सुरू आहे.
