पुणे: पुण्यातील कोरेगाव पार्क परिसरातील वेलवेट हॉटेलवर पोलिसांनी छापा टाकत ग्राहकांना बेकायदेशीररीत्या हुक्का पुरविला जात असल्याचा प्रकार उघडकीस आणला आहे. या कारवाईत हुक्का पॉट, तंबाखुजन्य पदार्थ, हुक्का फ्लेवर आणि इतर साहित्य जप्त करण्यात आले असून हॉटेलचा मालक, व्यवस्थापक आणि वेटरविरुद्ध गुन्हा दाखल करण्यात आला आहे.
या प्रकरणी रुणमेश संजय चिल्लय (वय 26, रा. सिंहगड रोड, पुणे) आणि निरंजन साई उपेंद्र साई (वय 20, रा. कवडेवाडी वस्ती, कोरेगाव पार्क) यांच्याविरुद्ध कोरेगाव पार्क पोलीस ठाण्यात गुन्हा दाखल करण्यात आला आहे. पोलीस अंमलदार रुपेश शंकर पांगारे यांनी याप्रकरणी फिर्याद दिली आहे.
पोलिसांनी दिलेल्या माहितीनुसार, 31 जुलैच्या रात्री वरिष्ठ पोलीस निरीक्षक विजयकुमार डोके यांना वेलवेट हॉटेलमध्ये ग्राहकांना गुप्तपणे हुक्का पुरविला जात असल्याची माहिती मिळाली होती. त्यानंतर सहायक वरिष्ठ पोलीस निरीक्षक जितेंद्र खैरनार आणि त्यांच्या पथकाने हॉटेलवर छापा टाकला.
पोलिसांनी हॉटेलच्या तिसऱ्या मजल्यावर प्रवेश केला असता चार टेबलांवर दहा ग्राहक हुक्क्याचे सेवन करत असल्याचे आढळून आले. त्यावेळी हॉटेलचा मालक, व्यवस्थापक आणि वेटर ग्राहकांना हुक्का सेवा पुरवत असल्याचेही निदर्शनास आले.
कारवाईदरम्यान पोलिसांनी हुक्का पॉट, तंबाखुजन्य पदार्थ, विविध प्रकारचे हुक्का फ्लेवर आणि इतर साहित्य जप्त केले. संबंधितांविरुद्ध आवश्यक कायदेशीर कारवाई करण्यात आली असून या प्रकरणाचा पुढील तपास पोलीस हवालदार अभंग करत आहेत.
