पुणे: खंडाळा घाटमाथ्यावरील निसर्गसौंदर्य पाहण्याच्या नादात एका पर्यटकाची कार थेट 50 ते 60 फूट खोल दरीत कोसळल्याची धक्कादायक घटना घडली. सुदैवाने दरीतील एका मोठ्या झाडाला कार अडकल्याने मोठा अनर्थ टळला. या घटनेत कारचालकाचा जीव वाचला असून पोलिसांच्या तत्परतेमुळे त्याची सुरक्षित सुटका करण्यात आली.
मोहित स्वरूप भटनागर (वय 59), सध्या वांद्रे (मुंबई) येथे वास्तव्यास असून मूळचे गुरुग्राम (हरियाणा) येथील आहेत. ते त्यांच्या स्कोडा कारने लोणावळा-खंडाळा परिसरात पर्यटनासाठी आले होते.
पोलिसांनी दिलेल्या माहितीनुसार, खंडाळा घाटमाथ्यावरील निसर्गरम्य परिसर आणि अलीकडेच चर्चेत आलेल्या मिसिंग लिंक प्रकल्पाचे दृश्य पाहण्यासाठी त्यांनी गारमाळ परिसर गाठला. परिसराचे छायाचित्र टिपण्याच्या उद्देशाने त्यांनी कार सुरक्षित ठिकाणी उभी न करता डोंगराच्या उताराकडे नेण्याचा प्रयत्न केला.
यावेळी कारवरील नियंत्रण सुटल्याने वाहन चार ते पाच पलट्या खात सुमारे 50 ते 60 फूट खोल दरीत कोसळले. मात्र दरीतील एका मोठ्या झाडाला कार अडकल्याने ती आणखी खाली घसरली नाही. त्यामुळे चालकाचा जीव वाचला आणि संभाव्य मोठी दुर्घटना टळली.
घटनेची माहिती मिळताच बोरघाट (दस्तुरी) महामार्ग पोलिसांनी तातडीने घटनास्थळी धाव घेत बचावकार्य सुरू केले. पोलिसांच्या मदतीने कारचालकाची सुखरूप सुटका करण्यात आली. या अपघातात कारचे मोठे नुकसान झाले असून पुढील तपास सुरू आहे.
या घटनेनंतर घाटमाथा आणि पर्यटनस्थळांवर फोटो किंवा व्हिडिओ काढण्याच्या नादात धोकादायक ठिकाणी वाहन नेणे टाळावे, तसेच सुरक्षिततेच्या नियमांचे पालन करावे, असे आवाहन पोलिसांनी पर्यटकांना केले आहे.
