सोलापूर : काही दिवसांतच घरात लग्नाची लगबग सुरू होणार होती. कुटुंबीय आणि मित्र त्याच्या आयुष्यातील नव्या पर्वाची तयारी करत असतानाच एका दुर्दैवी घटनेने सर्वांच्या आनंदावर विरजण पडले. लक्ष्मी पेठ परिसरातील 30 वर्षीय अक्षय भागवत शिंदे याच्या अचानक निधनामुळे कुटुंबीय, नातेवाईक आणि मित्रपरिवारावर दुःखाचा डोंगर कोसळला आहे.
अक्षय शिंदे हा श्री छत्रपती प्रतिष्ठानचा संस्थापक अध्यक्ष होता. सामाजिक उपक्रमांमध्ये तो सक्रियपणे सहभागी होत असे. त्याच्या स्वभावामुळे मित्रपरिवारातही त्याची चांगली ओळख होती. आमराई आणि लक्ष्मी पेठ परिसरात या घटनेनंतर शोकाचे वातावरण निर्माण झाले.
गुरुवारी, 27 ऑगस्ट रोजी दुपारी सुमारे 1.40 वाजता ही घटना त्याच्या राहत्या घरी साडीच्या साहाय्याने स्लॅबच्या लोखंडी हुकाला गळफास घेतला. कुटुंबीयांच्या लक्षात आल्यानंतर त्यांनी तातडीने घटनेची माहिती दिल्यानंतर पोलिस हवालदार एम. आर. ढोबळे घटनास्थळी पोहोचले.
नातेवाईक आणि मित्रांच्या मदतीने अक्षयला तातडीने खाली आणून उपचारासाठी सोलापूर शहरातील श्री छत्रपती शिवाजी महाराज सर्वोपचार रुग्णालयात नेण्यात आले. मात्र, डॉक्टरांनी त्याला मृत घोषित केले.
अक्षयच्या निधनाची बातमी समजताच मित्र, सामाजिक कार्यकर्ते आणि परिचितांनी रुग्णालयात मोठी गर्दी केली. नेहमी उत्साही आणि सामाजिक कामात पुढे असलेल्या मित्राचा अचानक मृत्यू झाल्याने अनेकांना धक्का बसला.
या घटनेची नोंद सिव्हिल पोलिस चौकीत करण्यात आली आहे. अक्षयने असे टोकाचे पाऊल का उचलले, याचे नेमके कारण अद्याप स्पष्ट झालेले नाही. पोलिसांकडून या प्रकरणाचा पुढील तपास सुरू आहे.
