छत्रपती संभाजीनगर : कुणबी जात वैधता प्रमाणपत्राच्या मुद्द्यावरून पुन्हा एकदा वाद निर्माण झाला आहे. वैजापूर तालुक्यातील बाधणी येथील शीतल सोनवणे आणि तिच्या कुटुंबाला जात वैधता प्रमाणपत्र नाकारण्यात आल्याने तिच्या उच्च शिक्षणाचा प्रश्न निर्माण झाला आहे. कुटुंबाकडे जुन्या नोंदी आणि कुणबी जातीचे पुरावे असल्याचा दावा करण्यात आला आहे.
शीतल आणि तिच्या भावाने उच्च शिक्षणासाठी विविध अभ्यासक्रमांमध्ये प्रवेश घेतला आहे. मात्र, प्रवेश प्रक्रियेदरम्यान जात वैधता प्रमाणपत्र सादर करणे आवश्यक असल्याने त्यांच्या अडचणी वाढल्या आहेत. प्रमाणपत्र मिळाले नाही तर शासकीय सवलती आणि शिष्यवृत्तीचा लाभ मिळणार नसल्याची भीती कुटुंबीयांनी व्यक्त केली आहे. शेतकरी कुटुंबाची आर्थिक परिस्थिती लक्षात घेता पूर्ण शैक्षणिक शुल्क भरणे कठीण असल्याचेही सांगण्यात आले.
शीतलचे वडील उदय सोनवणे यांच्या म्हणण्यानुसार, त्यांच्या मुलीचा नाशिकमधील अभियांत्रिकी महाविद्यालयात प्रवेश झाला आहे. जात वैधता प्रमाणपत्रासाठी त्यांनी 26 डिसेंबर 2025 रोजी अर्ज केला होता. त्यांच्या आजोबांच्या नोंदीमध्ये कुणबी जातीचा उल्लेख असल्याचे त्यांनी सांगितले. तसेच प्रशासनाकडून कुटुंबाच्या वारसाबाबत चौकशीही करण्यात आली होती.
मात्र, जुन्या कागदपत्रांमध्ये त्यांच्या पणजोबांची नोंद मराठा असल्याचे कारण देत जात वैधता प्रमाणपत्र नाकारण्यात आल्याचा दावा सोनवणे कुटुंबाने केला आहे. मराठा-कुणबी समाजाच्या नोंदीबाबतचा प्रश्न कायम असताना विद्यार्थ्यांचे शैक्षणिक नुकसान होऊ नये, अशी मागणी होत आहे.
या प्रकरणावरून कुटुंबीयांनी तीव्र नाराजी व्यक्त केली असून प्रश्न मार्गी न लागल्यास टोकाचे पाऊल उचलण्याचा इशारा दिला आहे. दरम्यान, संबंधित जात पडताळणी समिती आणि राज्य सरकारने या प्रकरणात तातडीने लक्ष घालून विद्यार्थ्यांचे शिक्षण अडचणीत येऊ नये, यासाठी योग्य निर्णय घ्यावा, अशी मागणी होत आहे.
मराठा-कुणबी प्रमाणपत्राच्या मुद्द्यावर मनोज जरांगे यांनी यापूर्वीही चिंता व्यक्त केली होती. प्रमाणपत्राच्या अडचणींमुळे विद्यार्थ्यांचे शिक्षण आणि तरुणांच्या रोजगाराच्या संधी प्रभावित होऊ शकतात, असे त्यांनी म्हटले होते.
