सूरत: गुजरातमधील सूरत शहरात भाजपच्या स्थानिक महिला नेत्या शशी सिंह यांच्या सुनेच्या आत्महत्येने खळबळ उडाली आहे. निधी सिंह या विवाहितेचा मृत्यू झाल्यानंतर सुरुवातीला या घटनेबाबत अनेक प्रश्न उपस्थित झाले होते. मात्र, शवविच्छेदनादरम्यान अंतर्वस्त्रात सापडलेल्या एका चिठ्ठीमुळे प्रकरणाला वेगळे वळण मिळाले आहे.
निधी सिंह या पळसाणा येथील कडोदरा परिसरातील श्रीनिवास सोसायटीमध्ये सासरच्या कुटुंबासोबत राहत होत्या. त्यांच्या मृत्यूनंतर कुटुंबीयांनी संशय व्यक्त करत मृतदेहाचे पॅनेल पोस्टमार्टम करण्याची मागणी केली होती. त्यामुळे पोलिस आणि वैद्यकीय पथकाकडून या प्रकरणाची सखोल तपासणी करण्यात येत आहे.
पोस्टमार्टम करतांना डॉक्टरांना निधी यांनी लिहिलेली एक चिठ्ठी मिळाल्याचे समोर आले. या चिठ्ठीत पतीकडून होत असलेल्या मानसिक त्रासासह त्याच्या कथित विवाहबाह्य संबंधांचा उल्लेख असल्याचा दावा करण्यात आला आहे. या चिठ्ठीमुळे निधी यांच्या मृत्यूमागील कारणांबाबत तपासाची दिशा बदलली.
निधी यांच्या भावाने या प्रकरणी पोलिसांकडे तक्रार दाखल केली. पती सौरभ याचे दुसऱ्या एका युवतीसोबत कथित संबंध असल्यामुळे निधी मानसिक तणावात होत्या आणि त्यातूनच त्यांनी टोकाचे पाऊल उचलल्याचा आरोप तक्रारीत करण्यात आला आहे.
या तक्रारीनंतर कडोदरा पोलिसांनी निधी यांचे पती सौरभ आणि त्याची कथित प्रेयसी यांच्याविरोधात आत्महत्येस प्रवृत्त केल्याप्रकरणी गुन्हा दाखल केला. पोलिसांनी प्राथमिक तपासासोबत उपलब्ध तांत्रिक आणि इतर पुराव्यांची पडताळणी सुरू केली.
तपासादरम्यान मिळालेल्या माहितीच्या आधारे दोन्ही आरोपींना पोलिसांनी अटक केली असून, प्रकरणाचा पुढील तपास सुरू आहे. निधी यांच्या मृत्यूमागील नेमकी परिस्थिती, कथित संबंध आणि चिठ्ठीत करण्यात आलेल्या आरोपांची सत्यता तपासानंतर स्पष्ट होणार आहे.
