पिंपरी-चिंचवड : वाकड परिसरातील ईशान सोसायटीमध्ये 42 वर्षीय विवाहितेचा संशयास्पद मृत्यू झाल्याने खळबळ उडाली आहे. शिल्पा सचिन गवारे असे मृत महिलेचे नाव आहे. माहेरहून पैसे आणावेत आणि वडिलांच्या मालमत्तेत हिस्सा मिळवावा, यासाठी सासरच्या मंडळींकडून तिचा मानसिक आणि शारीरिक छळ होत असल्याचा आरोप कुटुंबीयांनी केला आहे.
ही घटना 27 ऑगस्टच्या मध्यरात्रीच्या सुमारास प्रथम बंगल्यात घडल्याचे समोर आले. सासरच्या लोकांनी शिल्पा यांनी बेडरूममध्ये आत्महत्या केल्याची माहिती माहेरच्यांना दिली. त्यानंतर त्यांना उपचारासाठी खासगी रुग्णालयात नेण्यात आले. मात्र, डॉक्टरांनी त्यांना मृत घोषित केले.
दरम्यान, शिल्पा यांच्या मृत्यूबाबत आता गंभीर प्रश्न उपस्थित झाले आहेत. ज्या बेडरूममध्ये ही घटना घडली, त्या खोलीचा दरवाजा उघडा असल्याचे सांगितले जात आहे. त्यामुळे हा आत्महत्येचा प्रकार आहे की यामागे काही वेगळे कारण आहे, याबाबत माहेरच्या कुटुंबीयांनी संशय व्यक्त केला आहे. त्यांनी या प्रकरणाची सखोल चौकशी करण्याची मागणी केली आहे.
शिल्पा यांचा विवाह 2009 मध्ये सचिन गवारे यांच्यासोबत झाला होता. लग्नानंतर काही काळाने सासरच्या मंडळींकडून पैशांसाठी तिच्यावर दबाव आणला जात असल्याचा आरोप आहे. पतीकडून मारहाण होत असल्याचेही तक्रारीत नमूद करण्यात आले आहे. बहिणीचा संसार टिकावा म्हणून तिच्या भावाने सासरच्या मंडळींना आर्थिक मदत केल्याचे कुटुंबीयांनी सांगितले.
काही दिवसांपूर्वी माहेरच्या मालमत्तेशी संबंधित कागदपत्रांवर शिल्पा यांनी भावांच्या बाजूने सह्या केल्याचे सासरच्या मंडळींना समजले. त्यानंतर तिच्यावर वडिलांच्या मालमत्तेत हिस्सा घेण्यासाठी दबाव वाढल्याचा आरोप करण्यात आला आहे.
या प्रकरणी शिल्पा यांचे भाऊ संतोष गुलाब कलाटे यांनी वाकड पोलिस ठाण्यात तक्रार दाखल केली. त्यांच्या तक्रारीवरून पती सचिन गवारे, सासरे उत्तम गवारे, सासू संजीवनी गवारे आणि दीर संदीप गवारे यांच्याविरोधात आत्महत्येस प्रवृत्त करणे आणि छळ केल्याप्रकरणी गुन्हा दाखल करण्यात आला आहे. पोलिसांकडून पुढील तपास सुरू आहे.
