Tehsildar Suryakant Yewale: उपमुख्यमंत्री अजित पवार यांचे सुपुत्र पार्थ पवार यांच्या कंपनीशी संबंधित पुण्यातील कथित जमीन गैरव्यवहार (Pune Parth Pawar Land Scam) प्रकरणाने राज्यात खळबळ उडवून दिली आहे. या प्रकरणी महसूल विभागाने तातडीने कारवाई करत पुणे शहरचे तहसीलदार सूर्यकांत येवले यांना निलंबित केले आहे. यापूर्वी 20 ऑक्टोबरलाच निलंबनाचा प्रस्ताव महसूल विभागाकडे गेला होता, मात्र प्रसारमाध्यमांनी हे प्रकरण उचलून धरल्यानंतर अखेर कारवाईचे आदेश जारी करण्यात आले.
बळीचा बकरा बनवले जात आहे?
निलंबनाची कारवाई झाल्यानंतर तहसीलदार सूर्यकांत येवले यांनी माध्यमांसमोर येत आपली बाजू स्पष्ट केली. त्यांनी आपल्यावरील सर्व आरोप फेटाळले असून, या जमीन व्यवहाराशी आपला कोणताही संबंध नसल्याचा आणि कोणतीही फाईल आपल्याकडे आली नसल्याचा मोठा दावा केला आहे.
“पार्थ पवार यांच्या जमीन व्यवहाराशी माझा कोणताही संबंध नाही. ती फाईल माझ्याकडे आलीच नाही, अगदी जमीन व्यवहाराचा दस्तही मी पाहिलेला नाही. व्यवहाराला आमच्याकडून कोणतीही परवानगी देण्यात आलेली नाही. त्यामुळे माझ्यावर कोणत्या कारणाने कारवाई केली, हे देखील मला माहिती नाही.”
– सूर्यकांत येवले, निलंबित तहसीलदार
येवले यांनी या प्रकरणात जमीन व्यवहाराला कोणी परवानगी दिली, कोणत्या विभागाने दिली, याचीही कल्पना नसल्याचे सांगितले. हा जमीन खरेदीचा व्यवहार दुय्यम निबंधक कार्यालयाच्या अखत्यारीतील विषय असल्याने महसूल विभागाकडून ही कारवाई का झाली, याबद्दल त्यांनी आश्चर्य व्यक्त केले.
वरिष्ठांकडून कोणतीही विचारणा नाही
‘महार वतनाच्या’ जमिनीचा हा व्यवहार अतिरिक्त जिल्हाधिकारी किंवा उपजिल्हाधिकारी पातळीवरच होऊ शकतो. त्यामुळे ‘बड्या धेंडांना वाचवण्यासाठी तुम्हाला बळीचा बकरा बनवले जात आहे का?’ या प्रश्नावर येवले यांनी थेट बोलणे टाळले. त्यांनी महसूलमंत्री चंद्रशेखर बावनकुळे किंवा अन्य कोणत्याही वरिष्ठ अधिकाऱ्यांनी यापूर्वी आपल्याकडून कोणतीही माहिती मागवली नसल्याचे स्पष्ट केले. निलंबनाचा आदेश मिळाल्यावर अधिक बाबी स्पष्ट होतील, असेही त्यांनी सांगितले.
या प्रकरणात पुणे शहरचे दुय्यम निबंधक रवींद्र तारू यांनाही निलंबित करण्यात आले आहे. या संपूर्ण प्रकरणाची चौकशी करण्यासाठी राज्य सरकारने विकास खारगे यांच्या अध्यक्षतेखाली समिती स्थापन केली आहे.
