Pune Crime : पुणे : सोशल मीडियावर स्वतःला स्टार समजणाऱ्या संतोष पंडित याच्या वर्तनामुळे तो आता अडचणीत आला आहे. पुण्यातील टिळक रस्त्यावर एका महिला पत्रकाराशी गैरवर्तन केल्याच्या प्रकरणी त्याच्याविरोधात पोलिसांनी गुन्हा दाखल केला आहे. ही घटना सोमवारी एका आंदोलनादरम्यान घडली असून या प्रकारामुळे पत्रकारांमध्ये संताप व्यक्त केला जात आहे.
मिळालेल्या माहितीनुसार, नाशिकमधील अशोक खरात प्रकरणाच्या निषेधासाठी टिळक रस्त्यावरील एका महाविद्यालयाजवळ आंदोलन आयोजित करण्यात आले होते. या आंदोलनाचे वार्तांकन करण्यासाठी संबंधित महिला पत्रकार त्या ठिकाणी गेल्या होत्या. त्यावेळी संतोष पंडित देखील तिथे आला आणि अचानक त्याने पत्रकारांवर ओरडण्यास सुरुवात केली.
यानंतर त्याने महिला पत्रकारावर वैयक्तिक टीका करत तिच्या कपड्यांबाबत अर्वाच्य आणि अश्लील भाषेत टिप्पणी केली. पत्रकाराने त्याला विरोध केला तरीही त्याने तिच्या इच्छेविरुद्ध मोबाईलवर चित्रीकरण केले. या वर्तनामुळे परिसरात तणावाचे वातावरण निर्माण झाले.
या घटनेनंतर संबंधित महिला पत्रकाराने तत्काळ पर्वती पोलीस ठाण्यात जाऊन तक्रार दाखल केली. पोलिसांनी तक्रारीची दखल घेत संतोष पंडित याच्याविरोधात विनयभंग आणि इतर संबंधित कलमान्वये गुन्हा नोंदवला आहे. पुढील तपास पोलीस करत आहेत.
या प्रकरणामुळे सार्वजनिक ठिकाणी महिलांच्या सुरक्षेचा प्रश्न पुन्हा एकदा समोर आला आहे. सोशल मीडियावर प्रसिद्धी मिळवण्यासाठी काही जण अशा प्रकारे गैरवर्तन करत असल्याचेही या घटनेतून दिसून येते. नागरिकांनी आणि विशेषतः सार्वजनिक व्यक्तींनी जबाबदारीने वागणे आवश्यक असल्याचे मत व्यक्त केले जात आहे.
