Pune Crime News: पुणे : पुणे शहरात शेजाऱ्यांमधील किरकोळ वादातून गंभीर घटना घडल्याचे आणखी एक प्रकरण समोर आले आहे. वानवडी परिसरात गाडी हलवण्याच्या कारणावरून झालेल्या वादात एका व्यक्तीने आपल्या पाळीव कुत्र्यांना बाप-लेकावर सोडल्याची धक्कादायक घटना घडली आहे. या हल्ल्यात तरुण गंभीर जखमी झाला असून वानवडी पोलिसांनी कुत्र्याच्या मालकाविरोधात गुन्हा दाखल केला आहे.
मिळालेल्या माहितीनुसार, राजेंद्र एकनाथ जांभूळकर (वय 65, रा. वानवडी) यांनी याबाबत तक्रार दिली आहे. त्यांच्या आझादनगर भागातील जागेत बांधकामासाठी विटांचा ट्रक आला होता. मात्र शेजारी राहणारे जॉन गेगरी फर्नांडिस (वय 57) यांनी आपली वाहने जांभूळकर यांच्या गेटसमोर उभी केली होती. त्यामुळे ट्रक आत घेणे शक्य होत नव्हते.
जांभूळकर यांनी फर्नांडिस यांना गाड्या बाजूला करण्याची विनंती केली. मात्र त्यांनी नकार देत वाद घालण्यास सुरुवात केली. परिस्थिती तणावपूर्ण झाल्यावर जांभूळकर आणि त्यांचा मुलगा रोहन यांनी स्वतःच गाड्या हलवण्याचा प्रयत्न केला. यामुळे संतापलेल्या फर्नांडिस यांनी आपल्या 3 पाळीव जर्मन शेफर्ड कुत्र्यांना त्यांच्या अंगावर सोडले.
या हल्ल्यात एका कुत्र्याने रोहन यांच्या डाव्या पायाच्या पोटरीला जोरदार चावा घेतला, त्यामुळे त्यांना गंभीर दुखापत झाली आणि रक्तस्राव झाला. यानंतरही आरोपीने हातातील वस्तूने दोघांनाही मारहाण केली आणि जीवे मारण्याची धमकी दिली. परिसरात काही वेळ तणावाचे वातावरण निर्माण झाले.
घटनेनंतर जखमींनी वानवडी पोलीस ठाण्यात धाव घेत तक्रार नोंदवली. पोलिसांनी जॉन फर्नांडिस याच्याविरोधात भारतीय दंड संहितेच्या विविध कलमान्वये गुन्हा दाखल केला आहे. या प्रकरणाचा पुढील तपास पोलीस हवालदार क्षीरसागर करत आहेत.
