पुणे: पुण्यातील कोंढवा परिसरात एका 30 वर्षीय विवाहितेने आपल्या सासरच्या मंडळींविरुद्ध छळाची गंभीर फिर्याद दिली आहे. या प्रकरणात निवृत्त सहाय्यक पोलीस आयुक्त (एसीपी) यांचाही समावेश असून, त्यांनी सुनेकडे शरीर सुखाची मागणी केल्याचा धक्कादायक आरोप फिर्यादीत करण्यात आला आहे. या घटनेमुळे परिसरात खळबळ उडाली आहे.
फिर्यादी विवाहितेचे वडील मंत्रालयातील उपसचिव पदावरून निवृत्त झाले आहेत. नोव्हेंबर २०२१ मध्ये विक्रांत घाडगे याच्यासोबत साखरपुडा झाल्यानंतर, एप्रिल २०२२ मध्ये सासवड येथे विवाह झाला. लग्नानंतर काही दिवसांतच सासरच्या मंडळींनी छळाला सुरुवात केली. पती विक्रांत याने पत्नीला घरात कोंडून ठेवणे, तिची नोकरी सोडवणे आणि सोशल मीडिया खाती डिलीट करण्यास भाग पाडून तिचे मानसिक खच्चीकरण केले. सासूने विवाहितेचे सर्व दागिने स्वतःकडे काढून घेतले आणि माहेरच्या माणसांचा सतत अपमान केला.
फिर्यादीने दिलेल्या माहितीनुसार, निवृत्त एसीपी सुरेश घाडगे हे नेहमी आपल्या पदाचा आणि पैशांचा धाक दाखवून धमकावत असत. “मी आयुष्यभर गुन्हेगारांना जवळून पाहिले आहे, त्यामुळे पुरावे कसे नष्ट करायचे हे मला चांगले ठाऊक आहे,” असे ते म्हणत. तसेच “आम्ही कायदा विकत घेऊ शकतो आणि माझ्याकडे बंदूक आहे. तुला जिवंत गाडून टाकू,” अशा धमक्या देत असत. पती विक्रांत याचे इतर महिलांशी अनैतिक संबंध असून, त्याने घरी परस्त्रीला आणून पत्नीचा अपमान केल्याचा आरोपही तिने केला आहे.
८ मे २०२६ रोजी सासरच्या मंडळींनी फिर्यादी आणि तिच्या भावाच्या नात्यावर संशय घेऊन त्यांना त्रास दिला. अखेर आपल्या जीविताला धोका असल्याचे लक्षात येताच ती विवाहिता माहेरी निघून आली आणि तिने कोंढवा पोलीस ठाण्यात धाव घेतली. या प्रकरणी पती विक्रांत सुरेश घाडगे, सासरे सुरेश रामचंद्र घाडगे आणि सासू सुनंदा सुरेश घाडगे हे तिघेही कोंढव्यातील पारगेनगर येथील डीएसके गार्डन इन्क्लेव, वेलकम हॉलजवळ राहतात. तसेच, या गुन्ह्यात अकोला येथील नणंद स्नेहल प्रवीण सर्जेराव व प्रविण सर्जेराव आणि मुंबईतील अंधेरी येथे राहणारे नणंद वैशाली विक्रम राऊत व विक्रम राऊत यांचाही समावेश आहे. या सर्वांविरुद्ध पोलीस ठाण्यात गुन्हा नोंदवण्यात आला आहे. वरिष्ठ पोलीस निरीक्षक संतोष खेतमालस अधिक तपास करत आहेत.
