दौंड : बहिणीला पुण्याला कॉलेजला जाण्यासाठी रेल्वे स्टेशनवर सोडायला निघालेल्या भावाच्या दुचाकीला भरधाव ऊस वाहतूक करणाऱ्या ट्रॅक्टरने समोरून धडक दिल्याची घटना दौंडमधील धुमाळ वस्ती येथील फॉरेस्ट रस्त्याजवळ घडली. या अपघातात भाऊ किशोर आवटे आणि त्याची बहीण गायत्री हे दोघे किरकोळ जखमी झाले असून, दुचाकीचेही नुकसान झाले आहे. याप्रकरणी ट्रॅक्टरचालक विलास रामदास मोरे याच्याविरुद्ध दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, किशोर गौतम आवटे (वय 24, रा. नानवीन, ता. दौंड) हा 26 ऑक्टोबर रोजी सकाळी साडेआठच्या सुमारास आपली बहीण गायत्री हिला पुण्याला जाण्यासाठी रेल्वे स्टेशनवर सोडण्याकरिता दुचाकीवरून निघाला होता. सकाळी साडेआठ वाजण्याच्या सुमारास धुमाळ वस्ती येथील फॉरेस्ट रस्त्याजवळ आले असता, समोरून येणाऱ्या ऊस वाहतूक करणाऱ्या ट्रॅक्टरने त्यांच्या दुचाकीला धडक दिली.
तक्रारीनुसार, ट्रॅक्टर भरधाव वेगात येत होता. किशोरने हॉर्न वाजवून इशारा देण्याचा प्रयत्न केला; मात्र ट्रॅक्टरवरील टेपरेकॉर्डरवर मोठ्या आवाजात गाणी सुरू असल्याने चालकाचे लक्ष गेले नसल्याचा आरोप आहे. ट्रॅक्टरच्या धडकेमुळे किशोर आणि गायत्री दुचाकीसह रस्त्यावर पडले.
या अपघातात किशोरच्या पायाला मुकामार लागला असून, उजव्या हाताच्या कोपराला आणि डाव्या डोळ्याच्या वरच्या भागाला खरचटले आहे. गायत्रीच्या उजव्या पायाच्या गुडघ्यालाही खरचटले. घटनेची माहिती मिळताच किशोरच्या वडिलांनी घटनास्थळी धाव घेतली आणि दोघांना खासगी वाहनातून दौंड येथील पाटील हॉस्पिटलमध्ये उपचारासाठी दाखल केले.
या प्रकरणी ट्रॅक्टरचालक विलास रामदास मोरे (रा. कासारी, ता. नांदगाव, जि. नाशिक) याच्याविरुद्ध दौंड पोलीस ठाण्यात भारतीय न्याय संहितेतील संबंधित कलमे आणि मोटार वाहन कायद्यानुसार गुन्हा दाखल करण्यात आला आहे. पुढील तपास पोलीस अंमलदार चव्हाण करीत आहेत.
