उरुळी कांचन, (पुणे) : पुणे-सोलापूर महामार्गावर उरुळी कांचन हद्दीत चायनीज सेंटरच्या नावाखाली सुरू असलेल्या बेकायदेशीर दारू विक्रीच्या अड्ड्याचा उरुळी कांचन पोलिसांनी पर्दाफाश केला आहे. ‘हॉटेल गुरू चायनीज पॉईंट’च्या गाळ्यात विनापरवाना व बेकायदेशीरपणे देशी-विदेशी दारूची विक्री करणाऱ्या चालकावर पोलिसांनी छापा टाकून अटक केली. ही कारवाई सोमवारी (ता. 26) रात्री साडेआठ वाजण्याच्या सुमारास करण्यात आली.
हुसेन गफ्फुर शेख, (वय 42, सध्या रा. उरुळी कांचन, हॉटेल गुरू चायनिज पाँईट ता. हवेली जि पुणे मुळ रा. बारंगुळे प्लॉट गाडेगाव रोड, ता. बार्शी जि. सोलापुर) असे अटक करण्यात आलेल्या आरोपीचे नाव आहे. याप्रकरणी पोलीस अंमलदार राहुल आव्हाळे यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, सोमवारी (ता. 26) रात्री साडे आठवाजण्याच्या सुमारास उरुळी कांचन गावच्या हद्दीत पुणे-सोलापूर महामार्गावरील सोलापूर लेनवर असलेल्या ‘हॉटेल गुरू चायनीज पॉईंट’ च्या गाळ्यात बेकायदेशीर दारू विक्री सुरू असल्याची माहिती पोलिसांना मिळाली होती. त्यानुसार पोलीस अंमलदार राहुल आव्हाळे व त्यांच्या पथकाने तातडीने सदर ठिकाणी छापा टाकला.
पोलिसांनी चायनीज सेंटरच्या गाड्याची झाडाझडती घेतली असता, आरोपी हुसेन शेख हा आपल्या ओळखीच्या ग्राहकांना बेकायदेशीरपणे दारू विकताना रंगेहाथ सापडला. पोलिसांनी त्याच्या ताब्यातून देशी दारू ‘टॅगो पंच’, विदेशी दारू ‘इम्पेरिअल ब्लू’ असा 1 हजार 720 रुपयांचा मुद्देमाल मिळून आला. याप्रकरणी पोलिसांनी आरोपी हुसेन शेख याच्याविरुद्ध महाराष्ट्र दारूबंदी कायद्यानुसार गुन्हा (गु.र.नं. २८७/२०२६) नोंदवला आहे. पुढील तपास पोलीस हवालदार शिंदे करत आहेत.
