पुणे : दिवाळीच्या सणात गावी जाणाऱ्या प्रवाशांची गर्दी लक्षात घेऊन पुणे एसटी विभागाने मोठा निर्णय घेतला आहे. खाजगी ट्रॅव्हल्सचे वाढलेले भाडे आणि रेल्वेतील फुल्ल बुकिंगमुळे नागरिकांची होणारी अडचण दूर करण्यासाठी एसटी महामंडळाने 4 ते 7 नोव्हेंबर दरम्यान 1200 अतिरिक्त गाड्या सोडण्याची घोषणा केली आहे.त्यामुळे प्रवाशानां मोठा दिलासा मिळाला आहे.
कुठून सुटणार गाड्या?
पिंपरी-चिंचवड: विदर्भ, मराठवाडा आणि खान्देशात जाणाऱ्या प्रवाशांसाठी पिंपरी-चिंचवड येथून 900 हून अधिक बस सोडल्या जाणार आहेत.हे आगार थेट मेट्रोशी जोडलेले असल्याने प्रवाशांना इथे पोहोचणे अधिक सोपे होणार आहे. याआधी या गाड्या खडकी कॅन्टोन्मेंटवरून सुटत असत, पण गैरसोय टाळण्यासाठी यंदा ही नवी सोय करण्यात आली आहे.
स्वारगेट व वाकडेवाडी: सोलापूर, कोल्हापूर, सांगली, सातारा या पश्चिम महाराष्ट्रातील जिल्ह्यांसह कोकणात जाणाऱ्यांसाठी स्वारगेट आगारातून 300 जादा गाड्यांचे नियोजन केले आहे. यासोबतच वाकडेवाडी येथूनही काही विशेष बस धावतील.
या विशेष फेऱ्यांसोबतच नियमित वेळेत धावणाऱ्या एसटी गाड्या नेहमीप्रमाणेच सुरू राहतील. प्रवाशांनी प्रवासादरम्यान होणारी धावपळ टाळण्यासाठी एसटीच्या अधिकृत संकेतस्थळावरून किंवा ॲपवरून आधीच ऑनलाइन सीट बुकिंग करून ठेवावे, असे आवाहन पुणे विभागाचे नियंत्रक अरुण सिया यांनी केले आहे. त्यामुळे यंदाचा दिवाळीचा प्रवास प्रवाशांसाठी अधिक सोयीचा आणि खिशाला परवडणारा ठरणार आहे.
