दौंड : केडगाव–सुपे राज्य मार्गावरील चौफुला येथील कालव्यावर नवीन मोठा पूल उभारावा आणि पडवी ते सुपे घाट रस्त्याचे रुंदीकरण व सुधारणा करावी, अशी मागणी आमदार अॅड. राहुल कुल यांनी केली आहे. यासंदर्भात त्यांनी राज्याचे सार्वजनिक बांधकाम मंत्री छ. शिवेंद्रसिंहराजे भोसले यांची मंत्रालयात भेट घेऊन निवेदन सादर केले.
दौंड तालुक्यातील केडगाव ते सुपे हा वर्दळीचा मार्ग असून, या रस्त्यावर बोरीपार्धी–चौफुला परिसरात मुठा उजव्या कालव्यावर सध्या 3 गाळ्यांचा पूल आहे. हा पूल अरुंद असल्याने दोन मोठ्या वाहनांना एकाच वेळी ये-जा करताना अडचणी येतात. परिणामी वाहतूक कोंडी होते आणि अपघातांचा धोकाही वाढतो.
पुणे–सोलापूर राष्ट्रीय महामार्गावरील हडपसर ते यवत उन्नत महामार्गाचे काम सुरू झाल्यानंतर या मार्गावरील वाहतूक केडगाव–सुपे रस्त्याकडे वळवली जाण्याची शक्यता आहे. त्यामुळे भविष्यात वाहनांची संख्या वाढू शकते. हे लक्षात घेऊन चौफुला येथील सध्याच्या पुलाचे रुंदीकरण करून त्याऐवजी नवीन मोठा पूल बांधण्याची गरज आमदार कुल यांनी मांडली आहे.
याच मार्गावरील पडवी–सुपे घाटातही वाहनचालकांना अनेक अडचणींचा सामना करावा लागतो. या भागात तीव्र चढ-उतार आणि धोकादायक वळणे आहेत. रस्त्याची रचना योग्य नसल्याने काही जड वाहने चढावर मागे घसरतात, तर वळणांवर वाहनांवरील नियंत्रण सुटल्याने अपघात होण्याची शक्यता असते. काही वाहने दरीत कोसळल्याच्या घटनाही घडल्याचे निवेदनात नमूद करण्यात आले आहे.
हा धोका कमी करण्यासाठी आवश्यक भूसंपादन, घाट कटिंग आणि रस्त्याचा चढ कमी करण्यासह इतर सुधारणा तातडीने कराव्यात, अशी मागणी करण्यात आली आहे.
मंत्री शिवेंद्रसिंहराजे भोसले यांनी या मागण्यांबाबत सकारात्मक प्रतिसाद देत सार्वजनिक बांधकाम विभागाच्या पुणे येथील मुख्य अभियंत्यांना आवश्यक कार्यवाही करण्याच्या सूचना दिल्याचे सांगण्यात आले. दोन्ही कामांना मंजुरी मिळावी यासाठी पाठपुरावा सुरू ठेवणार असल्याचे आमदार राहुल कुल यांनी स्पष्ट केले.
