पुणे : पुणे रेल्वे स्टेशन परिसरात भूक लागल्याचे सांगून तरुणाकडे मदत मागणाऱ्या एका व्यक्तीने त्याचे खिसे तपासण्यास सुरुवात केली. याला विरोध केल्याने संबंधित तरुणावर लोखंडी हत्याराने वार करून त्याला गंभीर जखमी केल्याची घटना समोर आली आहे. २६ ऑक्टोबर रोजी दुपारी चारच्या सुमारास हा प्रकार घडला. या प्रकरणी बंडगार्डन पोलिसांनी आरोपीला अटक केली आहे.
अबुबकर अब्दुलरेहमान सिद्धी (वय ३२, रा. खालापूर, राजगड) असे अटक केलेल्या आरोपीचे नाव आहे. याप्रकरणी भवानी पेठ परिसरात राहणाऱ्या ३८ वर्षीय तरुणाने बंडगार्डन पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, तक्रारदार २६ ऑक्टोबर रोजी दुपारी चारच्या सुमारास पुणे रेल्वे स्टेशन परिसरात गेले होते. त्यावेळी झाडाखाली बसलेल्या एका व्यक्तीने त्यांच्याजवळ येऊन भूक लागल्याचे सांगत काहीतरी देण्याची मागणी केली. त्यानंतर संबंधित व्यक्तीने तक्रारदाराचे खिसे तपासण्यास सुरुवात केली.
खिसे तपासण्याच्या प्रकाराला तक्रारदाराने विरोध केला. त्यामुळे संतापलेल्या आरोपीने जवळ असलेल्या लोखंडी हत्याराने तरुणावर वार केले. या हल्ल्यात तरुण गंभीर जखमी झाला. घटनेनंतर याप्रकरणी पोलिसांकडे तक्रार दाखल करण्यात आली.
या घटनेप्रकरणी बंडगार्डन पोलिस ठाण्यात गुन्हा दाखल करण्यात आला असून, पोलिसांनी आरोपीला अटक केली आहे. या प्रकरणाचा पुढील तपास पोलीस उपनिरीक्षक गणेश चव्हाण करत आहेत.
