पुणे : पुणे विभागातील विधान परिषद निवडणुकांमध्ये महायुतीला मोठा धक्का बसला आहे.राष्ट्रवादी काँग्रेस (शरदचंद्र पवार) पक्षाच्या महाविकास आघाडी उमेदवार हर्षदा देशमुख यांनी या पदवीधर मतदारसंघात दणदणीत विजय मिळवला. या यशानंतर त्यांनी ज्येष्ठ नेते शरद पवार यांची भेट घेऊन आभार मानले. भेटीनंतर बोलताना त्या म्हणाल्या कि , 5 पैकी 3 जागा कशा जिकंतात हे शरद पवारांनी करून दाखवलं . त्यांचं सातत्याच मार्गदर्शन आम्हाला मिळालं असं त्या म्हणाल्या.
हर्षदा देशमुख यांनी नमूद केले की, तरुणांचे तसेच एमपीएससीच्या विद्यार्थ्यांचे प्रश्न आणि शिक्षण क्षेत्रातील समस्या गंभीर आहेत. या निकालामुळे महाविकास आघाडीला नक्कीच नवी ताकद मिळाली आहे. निवडणुकीत भाजप आणि शिंदे गटातील नाराजी उघड झाली असून त्यांच्या कार्यकर्त्यांची फळी असमाधानी होती. काँग्रेस नेते आमदार रवींद्र धंगेकर यांच्या प्रकृतीबाबत विचारले असता, त्यांच्या तब्येतीची विचारपूस करण्यासाठी त्यांना निश्चितपणे फोन करणार असल्याचे त्यांनी सांगितले. ही निवडणूक कोणत्या एका नेत्याभोवती केंद्रित नसून, मतदारांनी आणि जनतेने ती स्वतःच्या हातात घेतली होती, असे त्यांनी स्पष्ट केले.
पश्चिम महाराष्ट्रातील 5 जिल्ह्यांमध्ये फिरताना लोकांमध्ये तीव्र असंतोष दिसून आला आणि तोच रोष या निकालातून व्यक्त झाला आहे. शिक्षकांमध्येही सरकारच्या धोरणांबद्दल नाराजी असून शिक्षक मतदारसंघाच्या मतदानादरम्यान बोगस मतदान झाल्याचा गंभीर दावाही हर्षदा देशमुखांनी केला आहे.
दरम्यान पदवीधर आणि शिक्षक या दोन्ही जागांवर महायुतीमध्ये उमेदवारीवरून बराच ताणतणाव निर्माण झाला होता. अगदी शेवटच्या टप्प्यात भाजपने दोन्ही जागांवर उमेदवार जाहीर केले, तर शिंदे गटानेही शिक्षक मतदारसंघात आपला उमेदवार मैदानात उतरवला. मात्र, या राजकीय गदारोळात पदवीधर मतदारसंघात भाजपला पराभवाचा सामना करावा लागला.
