मुंबई : दिवाळीपूर्वी सरकारी कर्मचारी आणि कामगारांसाठी बोनसची घोषणा केली जात असताना आता मुंबई महानगरपालिकेनेही आपल्या अधिकारी, कर्मचारी आणि कामगारांसाठी आनंदाची बातमी दिली आहे. बृहन्मुंबई महानगरपालिकेच्या कर्मचाऱ्यांना दिवाळी २०२६ निमित्त ३३ हजार रुपयांचा बोनस जाहीर करण्यात आला आहे. गेल्या वर्षीच्या तुलनेत यंदा बोनसच्या रकमेत दोन हजार रुपयांची वाढ करण्यात आली आहे. त्यामुळे महापालिका कर्मचाऱ्यांमध्ये आनंदाचे वातावरण आहे.
मुंबई महानगरपालिकेच्या वतीने दिवाळी बोनस जाहीर करण्यात आला असून, यासंदर्भात मुंबईच्या महापौर रितू तावडे पत्रकार परिषदेत माहिती देणार असल्याचे सांगण्यात आले आहे. दिवाळीपूर्वी कर्मचाऱ्यांच्या खात्यात बोनसची रक्कम जमा केली जाणार आहे. त्यामुळे सणाच्या खरेदीसाठी कर्मचाऱ्यांना आर्थिक मदत मिळणार आहे.
गेल्या वर्षी मुंबई महानगरपालिकेच्या कर्मचाऱ्यांना ३१ हजार रुपयांचा बोनस देण्यात आला होता. यंदा ही रक्कम वाढवून ३३ हजार रुपये करण्यात आली आहे. म्हणजेच कर्मचाऱ्यांना गेल्या वर्षीपेक्षा दोन हजार रुपये अधिक मिळणार आहेत. या बोनसपोटी मुंबई महापालिकेच्या तिजोरीवर सुमारे ३०० कोटी रुपयांपेक्षा अधिक आर्थिक भार पडण्याची शक्यता आहे.
दरम्यान, कल्याण-डोंबिवली महानगरपालिकेनेही आपल्या अधिकारी आणि कर्मचाऱ्यांसाठी दिवाळी बोनस जाहीर केला आहे. केडीएमसीच्या कर्मचाऱ्यांना २१ हजार रुपये, तर आशा सेविकांना सहा हजार रुपये बोनस दिला जाणार आहे. महापालिका आयुक्त अभिनव गोयल यांनी यासंदर्भात घोषणा केली आहे. दिवाळीपूर्वी ही रक्कम कर्मचाऱ्यांच्या खात्यात जमा केली जाणार असल्याची माहिती आहे.
कल्याण-डोंबिवली महापालिकेतील वर्ग एक आणि वर्ग दोनचे अधिकारी, विविध श्रेणीतील कामगार, ठोक पगारी कर्मचारी, वाहनचालक, केडीएमटीचे कामगार, महापालिकेच्या शाळांमधील शिक्षक तसेच विविध आरोग्य योजनांमध्ये काम करणाऱ्या कर्मचाऱ्यांना या बोनसचा लाभ मिळणार आहे.
दिवाळीच्या पार्श्वभूमीवर मुंबई आणि कल्याण-डोंबिवली महापालिकांनी बोनस जाहीर केल्याने कर्मचाऱ्यांना मोठा दिलासा मिळाला आहे. आता इतर महापालिका आणि स्थानिक स्वराज्य संस्थांकडून कर्मचाऱ्यांसाठी कोणत्या घोषणा केल्या जातात, याकडेही सर्वांचे लक्ष लागले आहे.
