पुणे : पौड रस्त्यावरील वनाज ते चांदणी चौक या मेट्रो मार्गावर काम सुरू असल्याने वाहतूक व्यवस्थेत महत्त्वाचे बदल करण्यात आले आहेत. चांदणी चौकातून कोथरूडच्या दिशेने येणाऱ्या जड वाहनांसह एसटी आणि खासगी प्रवासी बसेसना सध्याच्या मार्गावरून जाण्यास तात्पुरती बंदी घालण्यात आली आहे. त्यामुळे या वाहनचालकांना आता पर्यायी रस्त्याचा वापर करावा लागणार आहे.
वाहतूक कोंडी कमी करणे आणि संभाव्य अपघात टाळणे, हा या बदलांमागील मुख्य उद्देश आहे. नव्या नियोजनानुसार, चांदणी चौकातून येणाऱ्या संबंधित वाहनांना डुक्कर खिंड आणि वारजे जंक्शनमार्गे पुढे जावे लागेल. त्यामुळे प्रवासाला निघण्यापूर्वी वाहनचालकांनी पर्यायी मार्गाची माहिती घेणे आवश्यक आहे.
कोथरूड परिसरात मेट्रोच्या कामासाठी रस्त्याच्या दुभाजकाच्या दोन्ही बाजूंना बॅरिकेड्स लावण्याचे काम सुरू आहे. यामुळे रस्त्यावरील उपलब्ध जागा कमी होत आहे. विशेषतः चांदणी चौकातून कोथरूड डेपोकडे येणारा रस्ता अरुंद असून त्याला तीव्र उतारही आहे. या ठिकाणी मोठ्या वाहनांची वाहतूक सुरू राहिल्यास कोंडी होण्याबरोबरच अपघाताचा धोकाही वाढू शकतो.
ही परिस्थिती लक्षात घेऊन प्रथमेश इलाईट सोसायटीसमोर उंची नियंत्रित करणारे ‘हाइट बॅरिकेड्स’ बसवण्यात येणार आहेत. यासंदर्भातील अधिकृत आदेश वाहतूक शाखेचे पोलीस उपायुक्त डॉ. संदीप भाजीभाकरे यांनी जारी केले आहेत.
दरम्यान, या वाहतूक बदलांबाबत नागरिकांना काही हरकती किंवा सूचना द्यायच्या असल्यास त्या लेखी स्वरूपात सादर करता येणार आहेत. यासाठी 10 नोव्हेंबरपर्यंत येरवडा येथील पोलीस उपायुक्त, वाहतूक नियंत्रण शाखेच्या कार्यालयात आपले म्हणणे मांडण्याचे आवाहन करण्यात आले आहे.
या बदलांमुळे संबंधित मार्गावरील वाहतूक अधिक सुरक्षित आणि सुरळीत करण्याचा प्रयत्न प्रशासनाकडून केला जात आहे.
