ओमकार भोरडे
शिरूर: शेतातील पाणी साठवण्यासाठी केलेला बांध फोडल्याचा जाब विचारायला गेलेल्या दोघांना लाथाबुक्क्यांनी बेदम मारहाण करत जिवे ठार मारण्याचा प्रयत्न करणाऱ्या दोन सराईत गुन्हेगारांना शिरूर पोलीस ठाण्याच्या DB पथकाने केवळ 2 तासात अटक केली आहे.
18 जून रोजी दुपारी 4:00 वा. निमोणे, ता. शिरूर येथील घोडनदीच्या पात्रात फिर्यादी दत्तात्रय नानासो काळे यांनी शेतातील पाणी साचावे यासाठी केलेला बांध आरोपी संकेत ज्ञानदेव काळे, शुभम ज्ञानदेव काळे व समिर प्रकाश शेलार या तिघांनी मोटारसायकलवरून येऊन फोडला.
बांध का फोडला असा जाब विचारण्यासाठी गेलेल्या फिर्यादी व त्यांचे भाऊ अक्षय काळे यांच्यावर आरोपी तुटून पडले. संकेत काळे व शुभम काळे यांनी दोघांनाही डोक्यात, तोंडावर, पाठीवर, छातीवर बेदम मारहाण केली. समिर शेलारने लाथाबुक्क्यांनी मारहाण केली. तसेच “जिवे ठार मारू” अशी धमकी दिली.
मारहाण करून तिघेही मोटारसायकलवरून निमोणे गावातून निघून जाताना गावकऱ्यांना “आम्ही जेलमध्ये राहून आलो आहे. आम्ही कोणाला घाबरत नाही. आमच्या नादाला लागलात तर कोणालाही सोडणार नाही” अशी दहशत निर्माण करणारी धमकी देऊन निघून गेले.
या प्रकरणी फिर्यादी श्री. दत्तात्रय नानासो काळे, वय 29, व्यवसाय शेती, रा. निमोणे यांनी दिलेल्या फिर्यादीवरून शिरूर पोलीस ठाण्यात गुन्हा दाखल करण्यात आला आहे.तपास पो.उपनि. शुभम चव्हाण यांच्याकडे सोपवला.
गुन्ह्याची गंभीरता लक्षात घेऊन पो.नि. विनोद पाटील यांनी तातडीने आरोपींचा शोध घेण्याचे आदेश दिले. तांत्रिक विश्लेषण व बातमीदारामार्फत माहिती घेत असताना पो.उपनि. शुभम चव्हाण यांना गोपनीय माहिती मिळाली की, आरोपी संकेत काळे व समिर शेलार हे गोलेगाव-करडे रोड परिसरात आहेत.
तातडीने सापळा लावून पोलीस पथकाने आरोपी 1) संकेत ज्ञानदेव काळे, वय 26, धंदा शेती, रा. निमोणे व 2) समिर प्रकाश शेलार, वय 23, धंदा शेती, रा. निमोणे यांना शिताफीने अटक केली. न्यायालयाने त्यांना दि. 22 जून पर्यंत पोलीस कोठडी रिमांड मंजूर केला आहे. तिसरा आरोपी शुभम काळे अद्याप फरार आहे.
अटक केलेल्या दोन्ही आरोपींवर यापूर्वी दरोडा, जिवे ठार मारण्याचा प्रयत्न, अवैध अग्निशस्त्र बाळगणे, मारहाण करून गंभीर जखमी करणे असे एकूण 12 गंभीर दखलपात्र गुन्हे दाखल आहेत.
ही कारवाई पोलीस अधीक्षक संदीप सिंह गिल्ल, अपर पोलीस अधीक्षक डॉ. शुभम कुमार, उपविभागीय पोलीस अधिकारी प्रशांत ढोले, पो.नि. विनोद पाटील यांच्या मार्गदर्शनाखाली पो.उपनि. शुभम चव्हाण, पो.हवा. अक्षय कळमकर, पो.अंमलदार नितेश थोरात, विजय शिंदे, अंबादास थोरे, निरज पिसाळ, निखील रावडे, सचिन भोई, रविंद्र काळे, अजय पाटील, दादाराव नागरे यांनी केली. 2 तासात गुन्हेगार जेरबंद करून शिरूर पोलिसांनी पुन्हा एकदा कार्यक्षमता सिद्ध केली आहे.
