पुणे: जुन्या वादाचा राग मनात ठेवून एका व्यक्तीने 46 वर्षीय व्यक्तीवर धारदार शस्त्राने हल्ला केल्याची घटना धनकवडीतील गुलाबनगर परिसरात घडली आहे. या हल्ल्यात निशांत मुकुंद पिसे गंभीर जखमी झाले आहेत. या प्रकरणी सहकारनगर पोलिसांनी समाधान प्रभू पवार याला अटक केली असून, खुनाचा प्रयत्न केल्याचा गुन्हा दाखल करण्यात आला आहे.
पोलिसांनी दिलेल्या माहितीनुसार, निशांत पिसे हे धनकवडीतील तळजाई पठार परिसरातील सुवर्णा हाईट्स येथे राहतात. तर आरोपी समाधान पवार हा आंबेगाव पठार परिसरातील नवजीवन मित्र मंडळाजवळ राहतो. तो भाजी विक्रीचा व्यवसाय करतो. काही दिवसांपूर्वी या दोघांमध्ये वाद झाला होता. या भांडणातून त्यांच्यात तणाव निर्माण झाल्याची प्राथमिक माहिती पोलिसांनी दिली आहे.
22 ऑक्टोबर रोजी निशांत पिसे हे धनकवडीतील गुलाबनगर परिसरातून जात असताना त्यांच्यावर हल्ला झाल्याचा आरोप आहे. जुन्या भांडणाचा राग मनात धरून समाधान पवार याने धारदार शस्त्राने निशांत यांच्या गळ्यावर वार केल्याचे सांगण्यात येत आहे. या हल्ल्यात त्यांच्या गळ्याला गंभीर दुखापत झाली. घटनेनंतर परिसरात खळबळ उडाली.
या घटनेनंतर जखमी निशांत पिसे यांचे वडील मुकुंद पिसे यांनी सहकारनगर पोलीस ठाण्यात तक्रार दाखल केली. तक्रारीची दखल घेत पोलिसांनी आरोपी समाधान पवार याच्याविरोधात खुनाच्या प्रयत्नाचा गुन्हा नोंदवला. त्यानंतर त्याला अटक करण्यात आली.
प्राथमिक माहितीनुसार, हा हल्ला दोघांमधील जुन्या वादातून झाल्याचा संशय आहे. मात्र, हल्ल्यामागील नेमकी कारणे आणि घटनेशी संबंधित इतर बाबींचा तपास सहकारनगर पोलीस करीत आहेत.
