पुणे : वाहतूक नियमांची अंमलबजावणी करताना वाहनचालकांना विनाकारण त्रास होऊ नये आणि दंडात्मक कारवाईत पारदर्शकता राहावी, यासाठी पुणे वाहतूक पोलिसांनी ई-चलन मशिनच्या वापरासाठी नवी कार्यपद्धती लागू करण्याचा निर्णय घेतला आहे. यानुसार, एका अधिकाऱ्याकडे एकच ई-चलन मशिन असेल. पहिल्या टप्प्यात 100 मशिन प्रायोगिक तत्त्वावर सुरू करण्यात येणार आहेत.
नव्या सूचनांनुसार, नियुक्त पोलीस कर्मचाऱ्यांना ठरवून दिलेल्या 11 प्रकारच्या वाहतूक नियमभंगांवरच ई-चलनद्वारे कारवाई करता येणार आहे. त्यामुळे नियमांची अंमलबजावणी करताना मनमानी होण्याची शक्यता कमी करण्याचा प्रयत्न केला जाणार आहे.
प्रत्येक मशिनची जबाबदारी निश्चित
यापूर्वी वाहतूक पोलिसांना नियमभंग करणाऱ्या वाहनचालकांवर कारवाई करण्यासाठी ई-चलन मशिन देण्यात आल्या होत्या. मात्र, ‘एन्फोर्समेंट हॉलिडे’ अंतर्गत या मशिनचा वापर थांबवून त्या जमा करण्यात आल्या होत्या. आता वाहतूक नियमांची प्रभावी अंमलबजावणी करण्यासाठी त्या पुन्हा वापरात आणण्याचे नियोजन आहे.
अतिरिक्त पोलीस आयुक्त मनोज पाटील यांच्या आदेशानुसार ही नवी कार्यपद्धती निश्चित करण्यात आली आहे. वाहतूक विभागातील उपलब्ध मनुष्यबळ आणि गरज लक्षात घेऊन मशिनचे वाटप केले जाणार आहे. हवालदार आणि सहायक पोलीस उपनिरीक्षक दर्जाच्या पात्र कर्मचाऱ्यांना ही जबाबदारी दिली जाणार आहे.
विनाकारण वाहन थांबवता येणार नाही
नव्या नियमांनुसार, वाहनचालकांना कोणतेही ठोस कारण नसताना रस्त्यात अडवून परवाना किंवा वाहनाची कागदपत्रे तपासता येणार नाहीत. तसेच, प्रत्यक्ष दिसलेल्या आणि निर्धारित यादीत समाविष्ट असलेल्या नियमभंगांचीच नोंद करावी लागणार आहे.
मनमानी पद्धतीने दंड आकारणे किंवा विनाकारण वाहनचालकांना थांबवणे यावर निर्बंध घालण्यात आले आहेत. यामुळे वाहतूक कारवाईत अधिक शिस्त येण्याची अपेक्षा आहे.
गंभीर नियमभंगांवर विशेष लक्ष
गंभीर स्वरूपाच्या वाहतूक नियमभंगांवर निरीक्षकांनी स्वतः कारवाई करण्याची तरतूदही नव्या सूचनांमध्ये करण्यात आली आहे. त्यामुळे कारवाईची जबाबदारी निश्चित होण्यास मदत होणार आहे.
एकूणच, ई-चलन मशिनच्या वापरासाठी ठरवलेल्या या नियमांमुळे वाहतूक पोलिसांच्या कारवाईत पारदर्शकता वाढवणे आणि वाहनचालकांना अनावश्यक त्रासापासून दिलासा देणे, हा मुख्य उद्देश आहे.
