पुणे: राज्याचे उपमुख्यमंत्री अजित पवार यांचे सुपुत्र पार्थ पवार (Parth Pawar) यांच्या अमिडिया कंपनीला (Pune News) नोंदणी व मुद्रांक शुल्क विभागाने नोटीस बजावली आहे. या नोटीसमध्ये कंपनीने एका जमीन खरेदी व्यवहारासाठी केवळ 500 रुपये मुद्रांक शुल्क भरल्याचा आरोप करण्यात आला आहे, जेथे प्रत्यक्षात 2 टक्के दराने सुमारे 6 कोटी रुपये शुल्क भरणे आवश्यक होते. शिवसेनेचे (उद्धव बाळासाहेब ठाकरे) नेते अंबादास दानवे यांनी याबाबत गंभीर आरोप केल्यानंतर विभागाने कारवाईची नोंद घेत ही नोटीस पाठवली.
नोटिसीनुसार, अमिडिया कंपनीने व्यवहाराच्या तपशीलात दिशाभूल केल्याचा आरोप आहे आणि कंपनीला तात्काळ उर्वरित 6 कोटी रुपये मुद्रांक शुल्क भरण्याचे आदेश देण्यात आले आहेत. या प्रकरणी पुढील चौकशी होण्याची शक्यता असून संबंधित अधिकाऱ्यांकडून व्यवहाराचे सर्व कागदपत्र तपासले जात आहेत. अजित पवार यांनी मात्र या घडामोडींवर अद्याप कोणतीही प्रतिक्रिया दिलेली नाही.
पार्थ पवार हे अमेडिया होल्डिंग्स एलएलपी या कंपनीचे संचालक असून त्यांचे मामेभाऊ आणि आमदार राणा जगजीतसिंह पाटील यांचे चुलत बंधू दिग्विजय पाटील हे या कंपनीत भागीदार आहेत. या दोघांनी मिळून पुण्यातील कोरेगाव पार्क येथील सरकारी जमीन खरेदी केली आहे. या व्यवहारात सरकारी नियमांना बगल देण्यात आल्याचा आरोप विरोधकांनी केला आहे. या प्रकरणातील सर्वात आश्चर्यकारक बाब म्हणजे 25 कोटी रुपयांची स्टॅम्प ड्युटी माफ करण्यात आली असून केवळ 500 रुपयांची ड्युटी भरून हा व्यवहार पूर्ण करण्यात आला.
विशेष म्हणजे, जमीन खरेदीचा व्यवहार झाल्यानंतर अवघ्या दोन दिवसांतच स्टॅम्प ड्युटी माफ करण्याचा निर्णय घेण्यात आला. एवढ्या मोठ्या रकमेची सूट एवढ्या कमी वेळात कशी मिळाली, यावर आता गंभीर प्रश्न उपस्थित केले जात आहेत. कोरेगाव पार्क हा पुण्यातील अतिउच्चभ्रू परिसर मानला जातो आणि तिथे असलेली ही 40 एकर सरकारी जमीन सर्व नियम धाब्यावर बसवून खरेदी केल्याचा आरोप होत आहे. या प्रकरणामुळे उपमुख्यमंत्री अजित पवार यांच्यावर विरोधकांनी जोरदार हल्ला चढवला आहे.
