उरुळी कांचन, ता. 01 : परिसरातील तुपे वस्ती भागात घरफोडी किंवा चोरी करण्याच्या उद्देशाने शस्त्रांसह दबा धरून बसलेल्या एका सराईत गुन्हेगाराला उरुळी कांचन पोलिसांनी रंगेहात पकडले आहे. तर दुसरा आरोपी अंधाराचा फायदा घेऊन फरार झाला. ही कारवाई शुक्रवारी (ता. 20) पहाटे तीन वाजण्याच्या सुमारास करण्यात आली.
विशाल कैलास साबळे (रा. तुपे वस्ती, उरुळी कांचन, ता. हवेली) असे ताब्यात घेण्यात आलेल्या आरोपीचे नाव आहे. तर सनी अगरवाल (पूर्ण नाव माहिती नाही, रा. तुपे वस्ती, उरुळी कांचन) असे फरार झालेल्या आरोपीचे नाव आहे. याप्रकरणी पोलीस कॉन्स्टेबल शरद चव्हाण यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शुक्रवारी (ता. 20) पहाटे तीन वाजण्याच्या सुमारास उरुळी कांचन पोलीस ठाण्याचे पोलीस कॉन्स्टेबल शरद चव्हाण व सहाय्यक फौजदार दाभाडे हे सरकारी वाहनातून रात्रगस्त घालत होते. यावेळी साखरे पेट्रोल पंप आणि सदानंद बेकरीच्या पाठीमागे तुपे वस्ती रोडवर दोन संशयित इसम तोंडाला काळा रुमाल बांधून गोल्डन रंगाच्या ॲक्टिव्हा गाडीसह अंधारात थांबलेले दिसले.
पोलिसांनी गाडी थांबवून चौकशीसाठी पुढे जाताच दोन्ही आरोपींनी दुचाकीवरून पळून जाण्याचा प्रयत्न केला. मात्र, सतर्क पोलिसांनी पाठलाग करून एकाला ताब्यात घेतले. ताब्यात घेतलेल्या इसमाने आपले नाव विशाल साबळे असल्याचे सांगितले. तर त्याचा साथीदार सनी अगरवाल अंधारात पळून जाण्यात यशस्वी झाला.
अटक करण्यात आलेल्या विशाल साबळे याच्याकडून घरफोडीसाठी वापरली जाणारी लोखंडी कटावणी, धारदार स्क्रू ड्रायव्हर, चेहरा झाकण्यासाठी वापरलेला काळा रुमाल तसेच गोल्डन रंगाची ॲक्टिव्हा जप्त करण्यात आली. या गाडीला पुढे किंवा मागे नंबर प्लेट नव्हती. शस्त्रांसह तिथे थांबण्याबाबत विचारले असता आरोपीने उडवाउडवीची उत्तरे दिली. तो घरफोडीच्या उद्देशानेच तिथे थांबल्याची खात्री पटल्याने पोलिसांनी त्याला अटक केली.
दरम्यान, या प्रकरणी पोलीस कॉन्स्टेबल शरद चव्हाण यांनी दिलेल्या फिर्यादीवरून विशाल साबळे आणि फरार सनी अगरवाल यांच्याविरुद्ध गुन्हा दाखल करण्यात आला आहे. या गुन्ह्याचा पुढील तपास पोलीस हवालदार चोरमले करत आहेत.
