उरुळी कांचन, (पुणे) : घरात लग्नाची लगबग, पाहुण्यांची रेलचेल आणि अवघ्या काही तासांवर येऊन ठेपलेला विवाह सोहळा… अशा आनंदाच्या वातावरणात घरातून नववधूसाठी केलेले तब्बल 4 लाख 20 हजार रुपये किमतीचे सोन्याचे दागिने घरातील कपाटातून अज्ञात चोरट्यांनी लंपास केल्याची घटना उघडकीस आली आहे. शिंदवणे (ता. हवेली) ग्रामपंचायत हद्दीत 23 जून ते 1 जुलै दरम्यान ही घटना घडली.
याबाबत अक्षय सुरेश कांचन (वय 29, रा. शिंदवणे, ता. हवेली, जि. पुणे) यांनी उरुळी कांचन पोलीस ठाण्यात फिर्याद दिली आहे. त्यानुसार अज्ञात चोरट्यांच्या विरोधात गुन्हा दाखल करण्यत आला आहे.
फिर्यादी अक्षय कांचन हे शिंदवणे रोडवर ‘अक्षय मेडिकल’ चालवून आपल्या कुटुंबाचा उदरनिर्वाह करतात. 3 जुलै 2026 रोजी लग्न आहे. विवाह सोहळ्यासाठी आणि होणाऱ्या पत्नीसाठी कांचन कुटुंबाने सोन्याचे दागिने घडवले होते. हे सर्व दागिने 23 जूनला अक्षय यांनी आपल्या घराच्या वरच्या मजल्यावरील बेडरूममधील लाकडी कपाटाच्या ड्रॉवरमध्ये सुरक्षित ठेवले होते.
लग्नकार्यामुळे 23 जून ते 1 जुलै दरम्यान घरामध्ये नातेवाईक आणि पाहुण्यांचे सतत येणे-जाणे सुरू होते. याच धामधुमीचा गैरफायदा घेत अज्ञात चोरट्याने कपाटातील दागिन्यांवर डल्ला मारला.गुरुवारी (ता. 01) सकाळी आठ वाजण्याच्या सुमारास अक्षय यांना लग्नाच्या विधींसाठी सोन्याचे दागिने त्यांच्या आईकडे द्यायचे होते.
त्यामुळे ते कपाटातील ड्रॉवर उघडण्यासाठी वरच्या मजल्यावर गेले. मात्र, ड्रॉवर उघडताच आत ठेवलेले सोन्याचे दागिने गायब होते. अक्षय यांनी तातडीने कुटुंबातील सदस्यांना विचारून संपूर्ण घरामध्ये दागिन्यांची शोधाशोध केली, मात्र दागिने कुठेही मिळून आले नाहीत. पाहुण्यांच्या गर्दीत कोणीतरी अज्ञात इसमाने हे दागिने चोरल्याची खात्री पटल्यानंतर अक्षय यांनीउरुळी कांचन पोलीस ठाण्यात धाव घेतली.
दरम्यान, चोरीला गेलेल्या दागिन्यांमध्ये तीन लाख रुपयांचे 58.85 ग्रॅम वजनाचे सोन्याचे मोठे गंठण, 1 लाख 20 हजार रुपये किमतीचे 13.88 ग्रॅम सोन्याचे मिनी गंठण असा तब्बल 4 लाख 20 हजार रुपये किमतीचा मुद्देमाल चोरी झाला आहे. अक्षय कांचन यांनी दिलेल्या तक्रारीवरून उरुळी कांचन पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. या घटनेचा पुढील तपास सहाय्यक पोलीस निरीक्षक पवार करत आहेत.
