पुणे: अध्यात्माच्या नावाखाली फसवणूक आणि लैंगिक शोषण करणारा नाशिकचा भोंदू बाबा अशोक खरात याच्या काळ्या साम्राज्याचा एकेक पदर आता उलगडू लागला आहे. खरातने केवळ नाशिकच नव्हे, तर पुण्यासारख्या महागड्या शहरातही कोट्यवधींची मालमत्ता जमवल्याचे तपासात समोर आले आहे. धक्कादायक बाब म्हणजे, पुण्याच्या अत्यंत पॉश समजल्या जाणाऱ्या ‘मॉडल कॉलनी’ परिसरात खरातच्या मुलीच्या नावे 1 कोटी 20 लाख रुपयांचा आलिशान 3-BHK फ्लॅट असल्याचे उघड झाले आहे.
एसआयटीच्या (SIT) तपासात समोर आलेली माहिती थक्क करणारी आहे. खरातने 13 सप्टेंबर 2023 रोजी पुणे येथील ’24 रत्नम’ या आलिशान सोसायटीत 1055 चौरस फुटांचा फ्लॅट खरेदी केला. विशेष म्हणजे, या व्यवहारासाठी बिल्डरला 1 कोटी 20 लाख रुपये चक्क ‘रोख’ (Cash) स्वरूपात देण्यात आले होते. सेल डीडमध्ये चेकने व्यवहार केल्याचा कोणताही उल्लेख नसल्याने, हा सर्व पैसा भक्तांना घाबरवून आणि फसवून जमवलेला ‘ब्लॅक मनी’ असल्याचा संशय बळावला आहे.
अशोक खरात आयकर विभागाला (Income Tax) वर्षाला केवळ 12 लाखांचे उत्पन्न दाखवत होता. मात्र, प्रत्यक्षात त्याची मालमत्ता शेकडो कोटींच्या घरात असल्याचा अंदाज आहे. या आर्थिक गैरव्यवहारामुळे आता आयकर विभाग खरातवर मोठी कारवाई करण्याच्या तयारीत असून, त्याच्या सीएचीही (CA) कसून चौकशी केली जात आहे.
पोलीस कोठडीची मुदत संपत असल्याने खरातला आज पुन्हा न्यायालयात हजर केले जाणार आहे. दरम्यान, शिर्डी येथील जमीन फसवणूक प्रकरणात खरातच्या पत्नीवरही गुन्हा दाखल झाला आहे. मात्र, पोलीस घरी पोहोचण्यापूर्वीच त्याची पत्नी कल्पना खरात फरार झाली, तर मुलगा हर्षवर्धन याला पोलिसांनी ताब्यात घेतले आहे. दरम्यान, आज अशोक खरात आणि त्याचा मुलगा हर्षवर्धन या दोघांची चौकशी केली जाणार आहे.
