पुणे: देशभरातील वाहनचालकांसाठी दिलासादायक बातमी आहे. नायरा एनर्जीने आपल्या देशभरातील पेट्रोल पंपांवर पेट्रोल आणि डिझेलच्या दरात कपात करण्याची घोषणा केली आहे. नव्या दरानुसार पेट्रोल प्रतिलिटर 5 रुपये, तर डिझेल प्रतिलिटर 3 रुपये स्वस्त मिळणार आहे. कंपनीचे देशभरात सुमारे 7,000 पेट्रोल पंप असून, या सर्व ठिकाणी सुधारित दर लागू करण्यात आले आहेत.
गेल्या काही आठवड्यांत अमेरिका, इस्रायल आणि इराण यांच्यातील संघर्षामुळे आंतरराष्ट्रीय बाजारात कच्च्या तेलाच्या किमती वाढल्या होत्या. त्याचा परिणाम भारतातील इंधनाच्या दरांवरही झाला होता. या काळात पेट्रोल आणि डिझेलच्या किमतीत टप्प्याटप्प्याने वाढ करण्यात आली होती. त्यामुळे सर्वसामान्य नागरिकांसह वाहतूक आणि उद्योग क्षेत्रावर आर्थिक ताण वाढला होता.
दरम्यान, केंद्र सरकारने 1 जुलैपासून पेट्रोल आणि डिझेलच्या विक्रीवरील काही तात्पुरते निर्बंध हटवले आहेत. यापूर्वी व्यावसायिक वापरासाठी रिटेल पंपांवरून इंधन खरेदी करण्यावर मर्यादा घालण्यात आली होती. ब्लॅक मार्केटिंग रोखण्यासाठी आणि इंधनाचा गैरवापर टाळण्यासाठी हे निर्बंध लागू करण्यात आले होते. आता परिस्थिती पूर्ववत होत असल्याने हे निर्बंध मागे घेण्यात आले आहेत.
इंधनाबरोबरच व्यावसायिक एलपीजी सिलेंडरच्या दरातही कपात करण्यात आली आहे. 19 किलोच्या व्यावसायिक गॅस सिलेंडरच्या किंमतीत 183.50 रुपये, तर 5 किलोच्या छोट्या सिलेंडरच्या दरात 13 रुपयांची घट करण्यात आली आहे. नव्या दरानुसार दिल्लीमध्ये 19 किलोचा सिलेंडर 2,930 रुपये, तर 5 किलोचा सिलेंडर 808.50 रुपयांना उपलब्ध होणार आहे.
इंधन आणि व्यावसायिक गॅस सिलेंडरच्या दरातील या कपातीमुळे व्यापारी, हॉटेल व्यवसाय, वाहतूक क्षेत्र तसेच सर्वसामान्य नागरिकांना काही प्रमाणात आर्थिक दिलासा मिळण्याची अपेक्षा व्यक्त केली जात आहे.
