पुणे: पुण्यात सुरू असलेल्या पावसाच्या पार्श्वभूमीवर आणि भारत निवडणूक आयोगाच्या विशेष मतदार यादी पुनरीक्षण मोहिमेमुळे पुणे महानगरपालिका क्षेत्रातील प्राथमिक शाळांच्या वेळेत तात्पुरता बदल करण्यात आला आहे. पुणे महापालिकेच्या प्राथमिक शिक्षण विभागाने याबाबत अधिकृत परिपत्रक जारी केले असून, हा बदल 1 जुलै ते 31 ऑगस्ट 2026 या कालावधीत लागू राहणार आहे.
नवीन वेळापत्रकानुसार महापालिका तसेच खासगी प्राथमिक शाळा आता सकाळी 7.00 ते दुपारी 12.15 या वेळेत भरतील. या बदलामुळे शिक्षकांना मतदार याद्यांच्या विशेष सखोल पुनरीक्षण (SIR) मोहिमेसाठी वेळ उपलब्ध होणार असून, विद्यार्थ्यांच्या शिक्षणावरही त्याचा परिणाम होणार नाही, असा महापालिकेचा उद्देश आहे.
भारत निवडणूक आयोगाने महाराष्ट्रासह देशातील अनेक राज्यांमध्ये मतदार याद्या अद्ययावत करण्याची मोहीम सुरू केली आहे. या प्रक्रियेत अनेक शिक्षकांना मतदान केंद्रस्तरीय अधिकारी म्हणून काम करावे लागणार आहे. त्यामुळे शाळेचे नियमित अध्यापन आणि निवडणुकीचे काम या दोन्ही गोष्टींचा समतोल राखण्यासाठी शाळांच्या वेळेत बदल करण्याचा निर्णय घेण्यात आला आहे.
पुणे महापालिकेच्या प्राथमिक शिक्षण विभागाच्या प्रशासकीय अधिकारी सुनंदा वाखारे आणि उपआयुक्त वसुंधरा बारवे यांनी सर्व महापालिका व खासगी प्राथमिक शाळांच्या मुख्याध्यापकांना या बदलाची माहिती तातडीने पालकांपर्यंत पोहोचवण्याचे निर्देश दिले आहेत. विद्यार्थ्यांची गैरसोय होऊ नये आणि पालकांनी वेळेचे योग्य नियोजन करता यावे, यासाठी शाळांनी आवश्यक सूचना देण्यास सांगण्यात आले आहे.
दरम्यान, राज्यात अनेक भागांत पावसाचा जोर कायम असून, काही जिल्ह्यांमध्ये शाळांना सुट्ट्याही जाहीर करण्यात आल्या आहेत. अशा परिस्थितीत पुण्यात मात्र शाळा सुरू राहणार असून, केवळ त्यांच्या वेळेत तात्पुरता बदल करण्यात आला आहे. हा निर्णय 31 ऑगस्ट 2026 पर्यंत लागू राहणार असून, त्यानंतर पुढील परिस्थितीनुसार निर्णय घेतला जाईल.
