Pune traffic update : पुणे : पुणे शहरातील वाढत्या वाहतूक कोंडीमुळे नागरिकांना मोठा त्रास सहन करावा लागत आहे. अनेक भागांमध्ये दररोज लांबच लांब रांगा लागत असून काही ठिकाणी तासन्तास वाहनचालक अडकून पडतात. ही समस्या कमी करण्यासाठी प्रशासनाने आता महत्त्वाचे पाऊल उचलले आहे. पोलीस उपआयुक्त हिंमत जाधव यांनी कोंढवा आणि येरवडा परिसरात वाहतुकीत तात्पुरते बदल करण्याचे आदेश दिले आहेत.
कोंढवा वाहतूक विभागाने उंड्री चौक परिसरात नवीन नियम लागू केले आहेत. मंतरवाडी चौकाकडून होले वस्तीच्या दिशेने जाणाऱ्या वाहनांना उंड्री चौकातून सरळ जाऊन सुमारे 65 मीटर पुढे यु-टर्न घ्यावा लागेल. तसेच वडाचीवाडी गावाकडून येणाऱ्या वाहनांनी चौकात डावीकडे वळून 65 मीटर पुढे जाऊन यु-टर्न घ्यावा लागणार आहे.
एनआयबीएम आणि होले वस्ती चौकाकडून खडी मशीन चौकाकडे जाणाऱ्या वाहनचालकांना उंड्री चौकात डावीकडे वळून 25 मीटर पुढे जाऊन यु-टर्न घेण्याचे निर्देश देण्यात आले आहेत. तर खडी मशीन चौकाकडून वडाचीवाडीच्या दिशेने जाणाऱ्या वाहनांनी चौकातून सरळ जाऊन 25 मीटर पुढे यु-टर्न घ्यावा लागेल.
येरवडा भागातही शादलबाबा चौक परिसरात बदल करण्यात आले आहेत. डॉ. बाबासाहेब आंबेडकर चौकाकडून येणाऱ्या वाहनांना शादलबाबा चौकात उजवीकडे वळण्यासाठी असलेला सिग्नल बंद करण्यात आला आहे. त्यामुळे आता वाहनचालकांनी पुढे जाऊन आळंदी रोड जंक्शन मार्गे प्रवास करावा लागणार आहे.
वाहतूक सुरळीत ठेवण्यासाठी नागरिकांनी या बदलांचे पालन करावे आणि पर्यायी मार्गांचा वापर करावा, असे आवाहन प्रशासनाकडून करण्यात आले आहे.
