पुणे: पुणे महापालिकेच्या मिळकत कर वसुलीला यंदाही सुरुवातीच्या टप्प्यात चांगली वसुली झाली आहे. ७ जुलैच्या संध्याकाळपर्यंत महापालिकेच्या तिजोरीत तब्बल १,४११ कोटी रुपयांचे उत्पन्न जमा झाले आहे. गेल्या वर्षी याच कालावधीत मिळालेल्या १,४१५ कोटींच्या वसुलीच्या तुलनेत यंदाची आकडेवारी जवळपास समान आहे.
महापालिकेने यंदा १ मेपासून मिळकत कराची बिले वाटप करण्यास सुरुवात केली होती. मात्र, ४० टक्के सवलतींची नोंद न झाल्याने बिल वाटपात एक महिन्याचा विलंब झाला. महापालिकेच्या सर्वसाधारण सभेच्या निर्णयानुसार, ३० जूनपर्यंत कर भरणाऱ्यांना ५ ते १० टक्के सवलत देण्यात आली होती. अखेरच्या दिवशी करदात्यांची मोठी गर्दी आणि ऑनलाइन प्रणालीवर ताण आल्याने सवलतीची मुदत ७ जुलैपर्यंत वाढविण्यात आली होती.
कर आकारणी विभागाचे प्रमुख अविनाश सपकाळ यांनी दिलेल्या माहितीनुसार, आज संध्याकाळपर्यंत ७,७५,१४० मिळकतधारकांनी एकूण १,४११ कोटींचा कर भरला. रात्री १२ वाजेपर्यंत ऑनलाइन व्यवहार सुरु राहणार असल्याने अंतिम रक्कम याहून अधिक होण्याची शक्यता आहे.
मागील वर्षी याच कालावधीत ७,७८,५१६ करदात्यांकडून १,४१५.६५ कोटी रुपये वसूल झाले होते. त्यावेळी मिळकत करामध्ये ४० टक्के सवलतीसह समाविष्ट गावांतील कर वसुली स्थगित होती. या पार्श्वभूमीवर यंदाची कामगिरी समाधानकारक असल्याचे सपकाळ यांनी नमूद केले.
सपकाळ यांनी सांगितले की, मिळकत कर वसुली अधिक प्रभावी करण्यासाठी अधिकारी आणि कर्मचाऱ्यांच्या बदल्या केल्या असून नव्याने नियुक्त झालेल्यांना प्रशिक्षण दिले जात आहे. थकबाकी वसुलीसाठी स्वतंत्र पथके तयार करण्यात येत असून, नवीन मिळकतींची नोंदणी आणि कर आकारणी न झालेल्या मिळकती शोधून त्यांच्यावर लक्ष केंद्रित केले जाणार आहे.
दुबार मिळकत कर प्रकरणे निकाली काढून वसुलीसाठी आवश्यक त्या उपाययोजना केल्या जातील. महापालिकेच्या अंदाजपत्रकीय उद्दिष्टपूर्तीसाठी सर्वतोपरी प्रयत्न सुरू असून, नागरिकांनी वेळेत कर भरणा करून कारवाई टाळावी आणि प्रशासनाला सहकार्य करावे, असे आवाहनही त्यांनी केले.
