Pune Bribe News पुणे, ता. ७ : पुणे : लाचलुचपत प्रतिबंधक विभागाने (ACB) पुण्यात मोठी कारवाई करत कोरेगाव पार्क पोलीस ठाण्यातील एका पोलीस हवालदाराला दीड लाख रुपयांची लाच स्वीकारताना रंगेहाथ पकडले. विशेष म्हणजे कारवाईदरम्यान आरोपीने तक्रारदाराच्या छातीवर चावा घेत पथकाला धक्काबुक्की करत पळून जाण्याचाही प्रयत्न केल्याने मोठी खळबळ उडाली आहे. Pune Bribe News
गणेश शहाजी कसपटे (वय ४०),असे अटक करण्यात आलेल्या पोलीस हवालदाराचे नाव आहे. तो फुरसुंगी येथील शंकर सुमन हाईट्समध्ये वास्तव्यास आहे. याप्रकरणी एका ५२ वर्षीय व्यक्तीने लाचलुचपत प्रतिबंधक विभागाकडे तक्रार केली होती.
लाचलुचपत प्रतिबंधक विभागाने दिलेल्या माहितीनुसार, तक्रारदाराच्या मालकाविरुद्ध हैदराबाद न्यायालयात धनादेश अनादराचा गुन्हा दाखल असून, त्यामध्ये अटक वॉरंट जारी झाले होते. हे वॉरंट बजावू नये आणि संबंधितांना अटक होऊ नये यासाठी आरोपी कसपटे याने यापूर्वीच पाच लाख रुपये घेतल्याचा आरोप आहे. त्यानंतर पुन्हा १ मे रोजी आरोपीने तक्रारदाराच्या मालकाला अटक न करण्यासाठी अडीच लाख रुपयांची मागणी केली. तडजोडीनंतर ही रक्कम दोन लाखांवर आली. याबाबत तक्रारदाराने ५ मे रोजी लाचलुचपत प्रतिबंधक विभागाकडे तक्रार दाखल केली. Pune Bribe News
पडताळणीदरम्यान आरोपीने यापूर्वी पाच लाख रुपये घेतल्याचे मान्य करत अखेरीस दीड लाख रुपये स्वीकारण्यास तयारी दर्शवली. त्यानुसार ६ मे रोजी दुपारी बोटक्लब रोडवरील सुलक्स कल्पतरू गार्डन सोसायटीसमोर सापळा रचण्यात आला. बुधवारी (ता.६) दुपारी दोन वाजण्याच्या सुमारा आरोपी गणेश कसपटे याने तक्रारदाराकडून दीड लाख रुपयांची लाच स्वीकारताच एसीबीच्या पथकाने त्याला रंगेहाथ पकडले. मात्र ताब्यात घेत असताना आरोपीने तक्रारदाराच्या छातीवर चावा घेतला तसेच अधिकाऱ्यांना धक्काबुक्की करत पळून जाण्याचा प्रयत्न केला. त्यामुळे काही काळ परिसरात गोंधळाचे वातावरण निर्माण झाले. Pune Bribe News
या प्रकरणी आरोपीविरुद्ध भ्रष्टाचार प्रतिबंधक अधिनियम तसेच भारतीय न्याय संहितेतील विविध कलमान्वये कोरेगाव पार्क पोलीस ठाण्यात गुन्हा दाखल करण्यात आला आहे. आहे. ही कारवाई पोलीस निरीक्षक प्रवीण निंबाळकर यांच्या मार्गदर्शनाखाली करण्यात आली असून, सहाय्यक पोलीस आयुक्त भारती मोरे पुढील तपास करत आहेत.
