पुणे: महाराष्ट्र राज्य पायाभूत सुविधा विकास महामंडळ मर्यादित फोर्ट, मुंबई यांच्यातर्फे दोन महत्त्वाच्या महामार्ग प्रकल्पांसाठी ई-निविदा मागवण्यात आल्या आहेत. ही निविदा प्रक्रिया महाराष्ट्र राज्य निविदा प्रणालीवरून (mahatenders.gov.in) ऑनलाईन पद्धतीने पार पडणार आहे. या निविदांसाठी फक्त नोंदणीकृत आणि अनुभवी कंत्राटदारांकडून अर्ज मागवण्यात आले आहेत. दोन्ही प्रकल्प DBFOT म्हणजेच Design, Build, Finance, Operate and Transfer टोल तत्वावर राबवण्यात येणार आहेत.
पहिला प्रकल्प पुणे जिल्ह्यातील हडपसर ते यवत या मार्गावर आहे. हा मार्ग अंदाजे ६५ किलोमीटर लांबीचा असून, या प्रकल्पात सहा पदरी उन्नत रस्त्याचे बांधकाम करण्यात येणार आहे. याशिवाय, सहा किलोमीटर लांबीचा जमिनीसमांतर सहा पदरी रस्ताही या प्रकल्पात समाविष्ट आहे. संपूर्ण प्रकल्पाची अंदाजित किंमत ३१४६.८५ कोटी रुपये आहे.
दुसरा प्रकल्प तळेगाव ते शिक्रापूर दरम्यानच्या मार्गावर आहे. या मार्गाची लांबी सुमारे ५३ किलोमीटर आहे. या प्रकल्पात काही भाग चार पदरी रस्ता असून, उर्वरित भागात जमिनीसमांतर सहा पदरी उन्नत महामार्गाचे बांधकाम करण्यात येणार आहे. या दुसऱ्या प्रकल्पाची अंदाजित किंमत ३१२३.९२ कोटी रुपये आहे.
या निविदांसाठी अर्ज सादर करण्यासाठी कालावधी ठरवण्यात आला आहे. ७ जुलै २०२५ रोजी सकाळी १०.३० वाजल्यापासून अर्ज प्रक्रिया सुरु होणार असून, ती १८ ऑगस्ट २०२५ रोजी संध्याकाळी ५ वाजेपर्यंत सुरु राहणार आहे. याआधी २९ जुलै २०२५ रोजी दुपारी ३ वाजता प्री-बिड बैठक आयोजित करण्यात आली आहे. तर निविदा उघडण्याची तारीख २० ऑगस्ट २०२५ रोजी सकाळी ११ वाजता निश्चित करण्यात आली आहे.
या दोन्ही प्रकल्पांद्वारे संबंधित भागांमध्ये वाहतुकीस अधिक सुसज्ज, गतिमान व सुरक्षित बनवण्याचा सरकारचा उद्देश आहे. या रस्त्यांच्या विकासामुळे औद्योगिक आणि व्यापारी हालचालींनाही चालना मिळेल. संपूर्ण प्रक्रिया पारदर्शकतेने आणि ऑनलाईन पद्धतीने पार पाडली जाणार असल्यामुळे यामध्ये अधिक संधी, स्पर्धा आणि गुणवत्ता सुनिश्चित होईल. या निविदा कंत्राटदारांसाठी एक मोठी व्यावसायिक संधी ठरू शकते.
