लोणी काळभोर, ता. 8 : ‘तु मला शिव्या नको देवूस’ असे म्हणाल्याने एकाच्या पोटात कात्री खुपसल्याची घटना घडली आहे. ही घटना कुंजीरवाडी (ता. हवेली) ग्रामपंचायत हद्दीतील हॉटेल ७७ च्या पाठमागे रविवारी (ता.6) सायंकाळी साडेपाच वाजण्याच्या सुमारास घडली आहे. या घटनेत एक जण जखमी झाला आहे. याप्रकरणी एकावर लोणी काळभोर पोलीस ठाण्यात गुन्हा दाखल करण्यात आला आहे.
अजित दमोदर कुंजीर (वय-३६, मु.पो. कुंजीरवाडी ग्रामपंचायतच्या पाठीमागे, ता. हवेली, जि-पुणे) असे जखमी झालेल्याचे नाव असून त्याच्यावर कुंजीरवाडी परिसरातील एका खाजगी रुग्णालयात उपचार सुरु आहेत. तर मारुती गलांडे (रा- मु.पो. कुंजीरवाडी ता. हवेली, जि-पुणे) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, फिर्यादी अजित कुंजीर हे नेहमीप्रमाणे रविवारी सायंकाळी पाच वाजण्याच्या सुमारास शेताकडे चालले होते. शेतीकडे जाणाऱ्या सामाईक रस्त्याने जात असताना, मारुती गलांडे व त्याचे मित्र गप्पा मारत बसले होते. त्या सर्वांना पाहुन फिर्यादी हे त्यांच्या जवळ गेले होते. तेव्हा मारुती गलांडे हा फिर्यादी अजित कुंजीरला पाहून म्हणाला, ” तु सारखा सारखा इकडुन का येत आहेस, तुझ्या मुळे माझे हॉटेल बंद पडले. माझे एवढे मोठे नुकसान झाले” असे म्हणाला.
‘तु मला शिव्या नको देवूस’ असे फिर्यादी कुंजीर म्हणाल्याचा राग मनात धरून मारुती गलांडे याने गुलाबाचे रोप कट करण्याची कात्री कुंजीर यांच्या पोटात खुपसली. तसेच कुंजीर यांना विटेनी मारहाण केली. या मारहाणीत कुंजीर यांच्या पोटातून रक्तस्त्राव होऊ लागला.
त्यानंतर तेथील मित्रांनी कुंजीर यांना उपचारासाठी कुंजीरवाडी येथील एका खाजगी रुग्णालयात उपचारासाठी दाखल केले असून कुंजीर यांची प्रकृती स्थिर असल्याची माहिती तेथील डॉक्टरांकडून मिळत आहे.
दरम्यान, या प्रकरणी अजित कुंजीर यांनी लोणी काळभोर पोलीस ठाण्यात फिर्याद दिली आहे. त्यानुसार मारुती गलांडे याच्या विरोधात भारतीय न्यास संहिता २०२३ चे कलम ११८ (१), ३५२ प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक रुपाली जाधव करीत आहेत.
