BIG BREAKING NEWS लोणी काळभोर, ता. ९ : “आमच्या गुरुच्या अपमानाचा बदला घेणार? याच दोन पिस्टलने तुला संपवून टाकू,” अशी धमकी देत राष्ट्रवादी काँग्रेस पक्ष (शरद पवार गट) चे प्रवक्ते विकास लवांडे यांच्यावर काळी शाई फेकून धक्काबुक्की केल्याची धक्कादायक घटना घडली आहे. ही घटना आळंदी म्हातोबाची (ता. हवेली) ग्रामपंचायत हद्दीतील स्मशानभूमीच्या प्रवेशद्वाराजवळ शनिवारी (ता. ९) सकाळी दहा वाजण्याच्या सुमारास घडली. या घटनेमुळे राजकीय वर्तुळात मोठी खळबळ उडाली असून, लोणी काळभोर पोलीस ठाण्यात १४ जणांविरोधात गुन्हा दाखल करण्यात आला आहे.BIG BREAKING NEWS
संग्राम भंडारे व अक्षय कांचन (रा. उरुळी कांचन, ता. हवेली) तसेच इतर १० ते १२ जणांविरोधात लोणी काळभोर पोलीस ठाण्यात गुन्हा दाखल करण्यात आला आहे. याप्रकरणी विकास लवांडे (वय ५४, व्यवसाय – प्रवचनकार, रा. शिंदे वस्ती, पो. आष्टापूर, ता. हवेली, जि. पुणे) यांनी लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, विकास लवांडे हे दशक्रीया कार्यक्रमासाठी शनिवारी सकाळी आळंदी म्हातोबाची येथे आले होते. कार्यक्रम आटोपल्यानंतर ते माघारी निघाले होते.म्हातोबाची आळंदी येथील स्मशानभूमीजवळ फिर्यादी विकास लवांडे यांच्या चारचाकी गाडीला (क्र. एमएच १२ एक्सएक्स ०५६९) पांढऱ्या रंगाच्या हायरायडर (क्र. एमएच १४ एमक्यू २८५६) तसेच इतर दोन पांढऱ्या रंगाच्या बलेनो गाड्यांनी ओव्हरटेक करून अडवले. त्यानंतर हायरायडर गाडीतून उतरलेल्या दोन इसमांनी विकास लवांडे यांच्याजवळ जाऊन पिस्टलचा धाक दाखवत त्यांना जबरदस्तीने गाडीतून बाहेर ओढले.BIG BREAKING NEWS
त्यानंतर संग्राम भंडारे, अक्षय कांचन तसेच इतर १० ते १२ जणांनी लवांडे आणि त्यांचे चालक संतोष गडदे यांना अश्लील भाषेत शिवीगाळ करून मारहाण केली. “तुला आम्ही जिवंत सोडणार नाही. याच दोन पिस्टलने तुला संपवून टाकू. आमच्या गुरुच्या अपमानाचा बदला घेणार,” अशी धमकी आरोपींनी दिल्याचे फिर्यादीत नमूद करण्यात आले आहे. याप्रकरणी विकास लवांडे यांनी लोणी काळभोर पोलीस ठाण्यात तक्रार दिली आहे. त्यानुसार संग्राम भंडारे, अक्षय कांचन व इतर १० ते १२ जणांविरोधात भारतीय न्याय संहीता 2023 चे कलम 127(2),189(2), 191(2),190,115(2),351(2), 352 प्रमाणे गुन्हा दाखल करण्यात आला आहे. BIG BREAKING NEWS
याबाबत बोलताना विकास लवांडे म्हणाले, “वारकरी संप्रदायातील कथित ‘२० घुसखोरांची’ नावे मी जाहीर केली होती. तेव्हापासून मला फोनवरून धमक्या येत आहेत. मी महाराष्ट्रभर फिरून प्रवचन करत असतो. बजरंग दल आणि गोरक्षकांकडून माझ्या जीवाला धोका आहे. पोलिसांनी मला संरक्षण द्यावे. तसेच या गुन्ह्यातील आरोपींना अटक होत नाही, तोपर्यंत मी आंदोलन सुरू ठेवणार आहे.
” दरम्यान, या घटनेनंतर राष्ट्रवादी काँग्रेस (शरद पवार गट) आक्रमक झाला असून, राज्यभरातून निषेध व्यक्त केला जात आहे. दरम्यान, रोहित पवार हे आज दुपारी लोणी काळभोर येथे येऊन लवांडे यांची भेट घेणार असल्याची माहिती समोर आली आहे. त्यामुळे या प्रकरणाला आणखी राजकीय रंग चढण्याची शक्यता व्यक्त केली जात आहे. BIG BREAKING NEWS
विकास लवांडेंचे पोलीस ठाण्यातच ठिय्या आंदोलन
विकास लवांडे यांनी या घटनेची तीव्र नाराजी व्यक्त करत लोणी पोलीस ठाण्यातच ठिय्या आंदोलन सुरु केले आहे. यावेळी संग्राम भंडारे, अक्षय कांचन व त्यांच्या सहकाऱ्यांच्याविरोधात घोषणाबाजी करण्यात आली आहे. जोपर्यत आरोपींना अटक केली जाणार नाही. तोपर्यंत आंदोलन मागे घेणार नाही. असा इशाराही विकास लवांडें यांनी पोलीस प्रशासनाला दिला आहे.
संग्राम भंडारे यांच्याकडून एक व्हिडीओ शेअर
विकास लवांडे गेल्या अनेक दिवसांपासून ज्या गुरुवर्यांनी मला हिंदू धर्माची शिकवण दिली, आम्हाला लहानाचं मोठं केलं, त्यांच्याबद्दल आक्षेपार्ह विधान करत असेल तर, त्यांना घुसखोर आणि धर्मांध म्हणत असेल तर आम्ही ते कसं सहन करु. “आमच्या गुरुवर्यांचा अपमान आम्ही सहन करणार नाही. निषेध म्हणून आम्ही त्यांच्यावर काळी शाई फेकली. मात्र पिस्तुल दाखविल्याचे आरोप खोटे आहेत,” असे भंडारे यांनी म्हटले आहे. तसेच, “यापुढेही गुरुवर्यांचा अपमान केल्यास परिणामांना सामोरे जावे लागेल,” असा इशाराही त्यांनी दिला.
आरोपींना पकडण्यासाठी पोलिसांचे पथक रवाना
या घटनेची माहिती मिळताच, कायदा व सुव्यवस्थेचा प्रश्न निर्माण होऊ नये,म्हणून पोलीस उपायुक्त सागर कवडे, सहाय्यक पोलीस आयुक्त अनुराधा उदमले, लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, हडपसर पोलीस ठाण्याचे वरिष्ठ पोलीस निरीक्षक संजय मोगले व पोलीस अधिकारी, सहाय्यक पोलीस निरीक्षक कृष्णा बाबर, सोमनाथ नाळे,अधिकारी व कर्मचारी मोठ्या संख्येने उपस्थित होते. पोलिसांनी गुन्हा दाखल झाल्यानंतर आरोपींना पकडण्यासाठी पथके रवाना केल्याची माहिती सूत्रांकडून मिळत आहे. BIG BREAKING NEWS
