पुणे: पुणे शहरात काही दिवसांपूर्वी घडलेल्या अमानुष खुनाच्या प्रकरणाचा छडा लावण्यात भारती विद्यापीठ पोलिसांना मोठे यश आले आहे. अनैतिक संबंधाच्या कारणातून ही हत्या झाल्याचे उघड झाले असून, सख्या चुलत भावानेच चार लाख रुपयांची सुपारी देऊन ही क्रूर घटना घडवल्याचे निष्पन्न झाले आहे. धक्कादायक बाब म्हणजे, या खुनाच्या घटनेत पहिला साक्षीदार देखील सामील असल्याचे स्पष्ट झाले आहे. पोलिसांनी मुख्य आरोपीसह एकूण चौघांना अटक केली आहे. (Pune Crime)
घटना काय?
कात्रजमधील गुजरवाडी परिसरात 17 नोव्हेंबर रोजी अजयकुमार गणेश पंडीत (वय 22 वर्ष) याचा तीक्ष्ण शस्त्राने निर्घृण खून करण्यात आला होता. या घटनेने परिसरात मोठी खळबळ माजली होती.
हेही वाचा: ”माझं टक्कल पडलं तरी हे… काय बोलावं!” अजित पवारांच्या ‘टक्कल’ वक्तव्याने भर सभेत सगळ्यांना हसवलं
चुलत भावावर संशय बळावला
पोलिसांनी या प्रकरणाचा सखोल तपास सुरू केला असता, मृत अजयकुमारचा चुलत भाऊ अशोक कैलास पंडीत (वय 35) याच्यावर संशय बळावला. पोलिसांनी अशोकला अटक करून कसून चौकशी केली. चौकशीदरम्यान, अजयचे आपल्या नात्यातील एका महिलेशी अनैतिक संबंध असल्याची माहिती अशोकला मिळाली होती. याच संशयाच्या आणि रागाच्या भरात अशोकने अजयकुमारचा खून करण्याचा कट रचून त्यासाठी सुपारी दिल्याचे समोर आले आहे.
साक्षीदारच निघाला आरोपी
पोलिसांच्या तपासात उघड झाले की, अशोकने अजयकुमारचा खून करण्यासाठी तिघांना चार लाख रुपयांची सुपारी दिली होती. सुपारी घेणाऱ्या आरोपींमध्ये कृष्णकुमार विजय महतो वर्मा (वय 21), सचिनकुमार शंकर पासवान (वय 26) आणि सर्वात महत्त्वाचे म्हणजे खुनाच्या घटनेतील पहिला साक्षीदार रणजितकुमार धनुखी यादव (वय 30) यांचा समावेश होता. रणजितकुमार यादव हा खुनाचा पहिला साक्षीदार असूनही तो या गुन्ह्यात सहभागी असल्याचे निष्पन्न झाले.
खुनाचा कट रचणारे हे चारही आरोपी पुणे रेल्वे स्थानकातून रेल्वेने मूळ गावी झारखंडकडे पसार होण्याच्या तयारीत असताना, पोलिसांनी त्यांना सापळा रचून तत्काळ बेड्या ठोकल्या. भारती विद्यापीठ पोलीस या प्रकरणाचा अधिक तपास करत आहेत.
हेही वाचा: मॅट्रिमोनिअलवर भेटले अन् पुण्यातील तरुणीला प्रेमाच्या जाळ्यात ओढून तरुणाने केलं धक्कादायक कृत्य
