पुणे: वडील आणि भावाकडून पैसे उकळण्यासाठी स्वतःच्या अपहरणाचा खोटा बनाव रचत दोन लाख रुपयांची खंडणी मागणाऱ्या 21 वर्षीय युवकाला बाणेर पोलिसांनी अटक केली आहे. मनीषकुमार जमनाप्रसाद द्विवेदी (रा. प्रयागराज, उत्तर प्रदेश) असे अटक करण्यात आलेल्या युवकाचे नाव आहे. (Pune Crime News)
12 वीमध्ये नापास झाल्यानंतर मनीषकुमार पुण्यात येऊन बाणेर परिसरात सुरक्षा रक्षक म्हणून काम करत होता. 9 फेब्रुवारी रोजी तो गावी येणार असल्याचे त्याने कुटुंबीयांना फोनवरून कळवले होते. मात्र त्याच रात्री त्याचा मोबाईल बंद लागल्याने संशय निर्माण झाला.
10 फेब्रुवारी 2026 रोजी त्याच्या मोबाईलवरून वडील आणि भावाला व्हॉट्सअॅपवर धमकीचा संदेश पाठवण्यात आला. “जर मुलाला जिवंत पाहायचे असेल तर सहा तासांत दोन लाख रुपयांची व्यवस्था करा; पोलिसांना कळविल्यास ठार मारू,” असा इशारावजा संदेश देण्यात आला होता. भावाच्या जीवाला धोका असल्याची भीती वाटल्याने त्याच्या भावाने तातडीने पुण्यात येऊन बाणेर पोलीस ठाण्यात तक्रार दाखल केली.
वरिष्ठ पोलीस निरीक्षक चंद्रशेखर सावंत आणि पोलीस निरीक्षक अलका सरग यांच्या मार्गदर्शनाखाली विशेष पथक स्थापन करण्यात आले. तांत्रिक विश्लेषणासह सीसीटीव्ही फुटेज आणि प्रवासाची माहिती तपासण्यात आली. तपासादरम्यान मनीषकुमार शहरात एकटाच रिक्षाने फिरत असल्याचे निष्पन्न झाले. तसेच म्हाळुंगे येथील एका सोसायटीत तो वारंवार मित्राकडे जात असल्याचेही आढळले.
पुढील तपासात तो अहमदाबादमार्गे प्रयागराजला गेल्याचे समोर आले. सहायक पोलीस निरीक्षक कैलास डाबेराव यांच्या पथकाने प्रयागराज येथे जाऊन चौकशी केली असता तो बारावीचे उर्वरित पेपर देण्यासाठी दुसऱ्या गावात गेल्याची माहिती मिळाली. नातेवाईकांच्या मदतीने त्याला पुण्यात आणण्यात आले.
दरम्यान, कुटुंबीयांनी त्याच्या खात्यावर 10 हजार रुपये आगाऊ रक्कम जमा केली होती. 23 फेब्रुवारी रोजी पुण्यात आल्यानंतर पोलिसांनी चौकशी केली असता मनीषकुमारने पैशांसाठीच अपहरणाचा बनाव केल्याची कबुली दिली. खोटी माहिती देऊन कुटुंबीयांकडून ऑनलाईन रक्कम उकळल्याप्रकरणी त्याला अटक करण्यात आली आहे.
या प्रकरणाचा पुढील तपास सहायक पोलीस निरीक्षक कैलास डाबेराव करत आहेत. वरिष्ठ अधिकाऱ्यांच्या मार्गदर्शनाखाली ही कारवाई करण्यात आली.
