Pune Crime: पुणे : पुणे जिल्ह्यातील भांबोली (ता. खेड) परिसरातून 35 लाख रुपये किमतीचा जेसीबी चोरी (JCB theft) करणाऱ्या आरोपीला पोलिसांनी अटक केली आहे. ही घटना सोमवार 5 जानेवारी रोजी रात्रीच्या सुमारास भांबोली येथील एम. के. आरएमसी प्लांटच्या पार्किंगमध्ये घडली होती. या घटनेमुळे परिसरात एकच खळबळ उडाली होती.
तळेगाव दाभाडे येथील रहिवासी दत्तात्रय मारुती कलावडे यांनी या प्रकरणी महाळुंगे पोलीस ठाण्यात तक्रार दाखल केली होती. कलावडे हे कामानिमित्त आपला जेसीबी भांबोली येथील प्लांटमध्ये वापरत होते. नेहमीप्रमाणे त्यांनी 35 लाख रुपये किमतीचा जेसीबी प्लांटच्या पार्किंगमध्ये उभा केला होता. मात्र रात्री अज्ञात चोरट्याने संधी साधून हा जेसीबी चोरून नेला.
दुसऱ्या दिवशी सकाळी जेसीबी पार्किंगमध्ये दिसून न आल्याने कलावडे यांनी परिसरात शोध घेतला. मात्र वाहन सापडले नाही. त्यानंतर त्यांनी पोलिसांकडे तक्रार दिली. तक्रार मिळताच महाळुंगे पोलिसांनी या प्रकरणाचा तपास सुरू केला.
पोलिसांनी तांत्रिक माहिती, सीसीटीव्ही फुटेज आणि इतर पुराव्यांच्या आधारे तपास करत संशयित आरोपी लक्ष्मण नामदेव नानवटे (वय 26, रा. परळी, जि. बीड) याला ताब्यात घेतले. पोलिसांनी केलेल्या चौकशीत आरोपीने जेसीबी चोरी केल्याची कबुली दिली.
पोलिसांनी आरोपीला अटक केली असून चोरीला गेलेला जेसीबी हस्तगत करण्यासाठी पुढील तपास सुरू आहे. एवढ्या मोठ्या आणि अवजड वाहनाची चोरी झाल्याने नागरिकांमध्ये आश्चर्य व्यक्त केले जात होते. मात्र पोलिसांनी वेगाने तपास करून आरोपीला अटक केल्यामुळे नागरिकांनी समाधान व्यक्त केले आहे. या प्रकरणाचा पुढील तपास महाळुंगे पोलीस करत आहेत.
