Katraj Crime: पुणे : कात्रज-मंतरवाडी बाह्यवळण मार्गावरील एका लॉजमध्ये सुरू असलेला वेश्याव्यवसायाचा प्रकार पोलिसांनी उघडकीस आणला आहे. फुरसुंगी पोलिसांनी मिळालेल्या गोपनीय माहितीनुसार एका लॉजवर छापा टाकत कारवाई केली. या कारवाईत लॉजमध्ये असलेल्या तरुणींना ताब्यात घेण्यात आले असून, त्यांना देहविक्रय करण्यास प्रवृत्त केल्याप्रकरणी एका महिलेसह पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, कात्रज-मंतरवाडी बाह्यवळण मार्गावर असलेल्या क्रिस्टल लॉजमध्ये बेकायदेशीर वेश्याव्यवसाय सुरू असल्याची माहिती फुरसुंगी पोलिसांना मिळाली होती. त्यानंतर पोलिसांनी सापळा रचून लॉजवर छापा टाकला. या वेळी लॉजमध्ये काही तरुणी असल्याचे आढळून आले. चौकशीदरम्यान त्यांना देहविक्रयासाठी प्रवृत्त करण्यात येत असल्याचे स्पष्ट झाले.
गुन्हा दाखल
या प्रकरणी अजय म्हस्के, अक्षय, सुधाकर, पवन सोनपारखे आणि बिंदा नावाच्या महिलेविरुद्ध गुन्हा दाखल करण्यात आला आहे. पोलीस उपनिरीक्षक तेहसीन बेग यांनी याबाबत फुरसुंगी पोलीस ठाण्यात फिर्याद दिली आहे. लॉज व्यवस्थापन आणि इतर आरोपींची भूमिका तपासात समोर येत असून, पुढील तपास सुरू आहे.
सहायक पोलीस आयुक्त अनुराधा उदमले आणि वरिष्ठ पोलीस निरीक्षक राजेश मोरे यांच्या मार्गदर्शनाखाली ही कारवाई करण्यात आली. गुन्हे शाखेचे पोलीस निरीक्षक राजेश खांडे या प्रकरणाचा तपास करत आहेत. पोलिसांनी लॉजमधील नोंदी, मोबाईल आणि इतर पुरावे ताब्यात घेतले आहेत.
दरम्यान, शहरात मसाज पार्लर आणि लॉजच्या आडून वेश्याव्यवसाय सुरू असल्याच्या तक्रारी वाढत आहेत. अशा प्रकारांवर कडक कारवाई करण्याचे आदेश पोलीस आयुक्त अमितेश कुमार यांनी दिले आहेत. याआधीही बाणेर भागातील एका लॉजवर छापा टाकून पोलिसांनी अशाच प्रकारचा गुन्हा उघडकीस आणला होता. बाणेर, बालेवाडी, कोरेगाव पार्क परिसरात सुरू असलेल्या अशा बेकायदेशीर व्यवसायांवर लक्ष ठेवले जात असून, पुढील काळात कारवाई अधिक तीव्र केली जाणार असल्याचे पोलिसांनी सांगितले आहे.
