Vijay Hazare Trophy : भारतीय क्रिकेट संघाचा दिग्गज फलंदाज विराट कोहली सध्या घरगुती क्रिकेटमध्ये आपल्या फलंदाजीची चमक दाखवत आहे. विजय हजारे ट्रॉफी २०२५ मध्ये दिल्लीचे प्रतिनिधित्व करताना विराटने गुजरातविरुद्धच्या सामन्यात उत्कृष्ट कामगिरी केली. मात्र, या सामन्यात केवळ आपल्या फलंदाजीनेच नव्हे, तर सामन्यानंतर केलेल्या एका खास कृतीने विराटने क्रिकेट चाहत्यांचे आणि क्रीडा विश्वाचे लक्ष वेधून घेतले आहे. (Vijay Hazare Trophy)
विशाल जैस्वालच्या फिरकीचा फटका
गुजरातविरुद्धच्या या महत्त्वपूर्ण सामन्यात विराट कोहली जबरदस्त फॉर्ममध्ये दिसत होता. त्याने दिल्लीसाठी ७७ धावांची शानदार खेळी केली. विराट ज्या पद्धतीने खेळत होता, ते पाहता तो आज शतक झळकावेल असे वाटत होते. मात्र, गुजरातचा फिरकीपटू विशाल जैस्वालने विराटला आपल्या फिरकीच्या जाळ्यात अडकवले आणि त्याचे शतक हुकले. महत्त्वाच्या टप्प्यावर बाद होऊनही विराटने मैदानाबाहेर जाताना संयम राखला.
सामन्यानंतरची ती खास भेट
सामना संपल्यानंतर मात्र मैदानावर एक वेगळेच दृश्य पाहायला मिळाले. ज्या विशाल जैस्वालने विराटची विकेट घेतली होती, त्याला विराटने स्वतःहून जवळ बोलावले. यावेळी विराटने विशालच्या गोलंदाजीचे कौतुक केले आणि त्याला आपली स्वाक्षरी केलेली एक खास भेट (Special Gift) दिली. विराटसारख्या महान खेळाडूकडून मिळालेली ही दाद पाहून विशाल जैस्वाल भारावून गेला होता.
खिलाडूवृत्तीची चर्चा
विराट कोहलीने दिलेली ही भेट आणि त्याचे विशालसोबतचे फोटो सध्या सोशल मीडियावर प्रचंड व्हायरल होत आहेत. आंतरराष्ट्रीय स्तरावर इतकी मोठी उंची गाठूनही, नवोदित खेळाडूंचे कौतुक करण्याची विराटची ही खिलाडूवृत्ती पाहून त्याच्यावर कौतुकाचा वर्षाव होत आहे. मैदानावरील आक्रमकता बाजूला ठेवून खेळाडूचा सन्मान कसा करावा, याचा वस्तुपाठच विराटने या निमित्ताने घालून दिला आहे.
