बारामती: बारामती तालुक्यात (Baramati News) मग्रुरी आणि दहशतीचा (baramati Crime) धक्कादायक प्रकार समोर आला आहे. लाईनमध्ये थांबायला (Pune Crime) नकार देत “मी मोठा आहे” अशी मग्रुरी दाखवणाऱ्या एका इसमाने सहकाऱ्यांच्या मदतीने थेट मटण दुकानदाराचे अपहरण करून त्याला जीवे ठार मारण्याचा प्रयत्न केल्याचा गंभीर प्रकार उघडकीस आला आहे. या घटनेमुळे बारामती परिसरात खळबळ उडाली आहे. (Latest Marathi News)
ऑफिसरची दमदाटी
ज्ञानेश्वर भारत आटोळे वय 27, रा. सावळ, ता. बारामती हे सुर्यनगरी परिसरात जय भवानी मटण शॉप चालवून कुटुंबाचा उदरनिर्वाह करतात. डिसेंबर महिन्यात एका इसमाने मटण खरेदीसाठी आले असताना लाईनमध्ये उभे राहण्यास नकार दिला. “गुगलवर माझं नाव शोध, मी मोठा ऑफिसर आहे” अशी दमदाटी करत त्याने दुकानदाराशी वाद घातला. यावेळी वजनाचा काटा उचलून मारण्याचा प्रयत्नही झाला. त्यानंतर तो इसम मटण घेऊन निघून गेला. ऑनलाईन पेमेंटमधून त्याचे नाव स्वागत हनुमंत सोरटे असल्याचे समोर आले.
अपहरण करत मारहाण
या घटनेचा राग मनात धरून 25 डिसेंबर रोजी सायंकाळी ज्ञानेश्वर आटोळे हे आपल्या कामगारासह बाहेर गेले असताना, ऋषी गावडे याच्यासोबत नियोजन करून पांढऱ्या रंगाच्या स्विफ्ट आणि क्रेटा कारमधून आलेल्या 5 जणांनी त्यांचे अपहरण केल्याचा आरोप आहे. त्यांना जबरदस्तीने स्विफ्ट कारमध्ये बसवून जळोची गावाच्या दिशेने नेण्यात आले. या दरम्यान व्हिडीओ कॉलद्वारे स्वागत सोरटे संपर्कात असून “मी सांगतो तसं करा” असे म्हणत मारहाणीचे आदेश दिल्याचा आरोप आहे.
जीवे मारण्याची धमकी
कन्हेरी रोड आणि जळोची ब्रिज परिसरात नेऊन कोयत्याच्या मुठीने, बेल्टने बेदम मारहाण करण्यात आली. “तुला जिवंत सोडणार नाही” अशी धमकीही देण्यात आली. मात्र वेळेत पोलीस, फिर्यादीचा भाऊ आणि नातेवाईक घटनास्थळी पोहोचल्याने मोठा अनर्थ टळला.
पोलीस तपास सुरु
या प्रकरणी अपहरण व मारहाणीचे गंभीर कलम लावून गुन्हा दाखल करण्यात आला आहे. आरोपी ऋषी गावडे याला अटक करण्यात आली असून न्यायालयाने त्याला 3 दिवसांची पोलीस कोठडी सुनावली आहे. तपासात संकेत मुसळे आणि शितल बेंगारे रा. पारवडी यांचा सहभागही निष्पन्न झाला असून उर्वरित आरोपींचा शोध सुरू आहे.
