पुणे, ता. 29 : आदिवासी विद्यार्थ्यांच्या विविध मागण्यांसाठी सुरू असलेल्या आंदोलनावरून राज्याचे महसूलमंत्री चंद्रशेखर बावनकुळे यांनी काँग्रेस आणि राहुल गांधी यांच्यावर जोरदार टीका केली आहे. विद्यार्थ्यांच्या प्रश्नांचे राजकारण करून राहुल गांधींचे महाराष्ट्रातील ‘रिलाँचिंग’ करण्याचा प्रयत्न काँग्रेसने थांबवावा, असे बावनकुळे यांनी म्हटले आहे.
महाराष्ट्रातील शासकीय वसतिगृहांच्या प्रवेशासाठी असलेली वयाची अट रद्द करणे, रिक्त पदांची भरती यांसह विविध मागण्यांसाठी पुणे, नाशिक आणि नागपूर येथे आदिवासी विद्यार्थ्यांचे आंदोलन व आमरण उपोषण सुरू आहे. या पार्श्वभूमीवर राहुल गांधी यांनी मुख्यमंत्री देवेंद्र फडणवीस यांना पत्र लिहिल्यानंतर राजकीय आरोप-प्रत्यारोपांना सुरुवात झाली आहे.
बावनकुळे म्हणाले की, आदिवासी विद्यार्थ्यांच्या मागण्यांबाबत सरकारने त्यांच्याशी चर्चा करून सकारात्मक निर्णय घेतले असून लिखित आश्वासनही दिले आहे. सरकार विद्यार्थ्यांशी पुन्हा पुन्हा संवाद साधण्यास तयार आहे. त्यामुळे प्रश्न मार्गी लागण्याच्या दिशेने असतानाही आंदोलन सुरू ठेवण्याचा हट्ट का, असा सवाल त्यांनी उपस्थित केला.
दरम्यान, मुख्यमंत्री देवेंद्र फडणवीस यांच्या नेतृत्वाखाली आदिवासी विद्यार्थ्यांना अधिक सुविधा आणि शैक्षणिक संधी उपलब्ध करून देण्यासाठी सरकार संवेदनशीलपणे काम करत असल्याचेही त्यांनी स्पष्ट केले.
‘राजकीय स्वार्थासाठी विद्यार्थ्यांचा वापर नको’
काँग्रेसला आदिवासी विद्यार्थ्यांच्या प्रश्नांची खरोखरच चिंता असेल, तर त्यांनी विद्यार्थ्यांना राजकीय आंदोलनाचे साधन न बनवता सरकारशी संवाद साधावा. ‘राजकीय स्वार्थासाठी विद्यार्थ्यांच्या खांद्यावर बंदूक ठेवू नका आणि त्यांच्या भवितव्याशी खेळू नका,’ असा टोला बावनकुळे यांनी काँग्रेसला लगावला.
