मुंबई : महाराष्ट्राच्या राजकारणात गेल्या काही वर्षांत मोठे बदल झाले आहेत. शिवसेना आणि राष्ट्रवादी काँग्रेसमध्ये फूट पडल्यानंतर झालेल्या लोकसभा निवडणुकीत महायुतीला मोठा धक्का बसला होता. भाजपसह महायुतीच्या जागांमध्ये घट झाली, तर महाविकास आघाडीने अपेक्षेपेक्षा चांगली कामगिरी करत राज्यात आघाडी घेतली होती. मात्र, त्यानंतरच्या काळात राजकीय समीकरणे बदलली आहेत. आता पुन्हा लोकसभा निवडणूक झाली तर महाराष्ट्राचा निकाल वेगळा असू शकतो, असा अंदाज एका नव्या सर्व्हेमधून व्यक्त करण्यात आला आहे.
एका खाजगी वृत्तसंस्थेने केलेल्या सर्वेक्षणानुसार, सध्या लोकसभा निवडणूक झाल्यास देशात पुन्हा एनडीएचे सरकार स्थापन होण्याची शक्यता आहे. एनडीएला 326 जागा मिळण्याचा अंदाज असून, इंडिया आघाडीला 185 जागा मिळू शकतात. 2024 च्या लोकसभा निवडणुकीत एनडीएला 293 जागा मिळाल्या होत्या, तर इंडिया आघाडीने 234 जागा जिंकल्या होत्या. त्यामुळे सध्याच्या अंदाजानुसार एनडीएची कामगिरी सुधारू शकते.
महाराष्ट्राचा विचार केल्यास सर्व्हेमधील आकडे विशेष लक्षवेधी आहेत. 2024 मध्ये राज्यातील मतदारांनी महायुतीला मोठा धक्का दिला होता. त्यावेळी भाजपला 9, शिवसेना (शिंदे गट) 7 आणि राष्ट्रवादी काँग्रेस (अजित पवार गट) यांना 1 जागा मिळाली होती. म्हणजेच महायुतीच्या वाट्याला एकूण 17 जागा आल्या होत्या. भाजपच्या जागांमध्येही मोठी घट झाली होती. मागील निवडणुकीत भाजपने 23 जागांवरून 9 जागांपर्यंत मजल गाठली होती.
याउलट महाविकास आघाडीने राज्यात जोरदार कामगिरी केली. काँग्रेसला 13, शिवसेना (ठाकरे गट) 9 आणि राष्ट्रवादी काँग्रेस (शरद पवार गट) 8 जागा मिळाल्या. या तिन्ही पक्षांची बेरीज 30 जागांवर पोहोचली. एका अपक्ष खासदाराच्या पाठिंब्यामुळे हा आकडा 31 पर्यंत गेला होता.
मात्र, आता परिस्थिती बदलल्याचा अंदाज सर्व्हेमध्ये व्यक्त करण्यात आला आहे. आज निवडणूक झाल्यास महाराष्ट्रात महायुतीला 31 जागा मिळू शकतात, तर महाविकास आघाडी 17 जागांवर थांबू शकते. म्हणजेच 2024 च्या निकालाच्या तुलनेत दोन्ही आघाड्यांचे चित्र जवळपास उलटे होण्याची शक्यता आहे.
मतांच्या टक्केवारीतही महायुतीला आघाडी मिळण्याचा अंदाज आहे. सर्व्हेनुसार महायुतीला सुमारे 49 टक्के मते मिळू शकतात, तर मविआला 43 टक्के मतांचा अंदाज आहे. त्यामुळे आगामी काळात महाराष्ट्रातील बदललेली राजकीय समीकरणे कोणाच्या बाजूने जातात, याकडे सर्वांचे लक्ष लागले आहे. मात्र, सर्व्हेतील अंदाज हे प्रत्यक्ष निवडणुकीचे निकाल नसतात. निवडणुकीपूर्वी बदलणारे राजकीय समीकरण, उमेदवार, स्थानिक प्रश्न आणि मतदारांचा कल यांचा अंतिम निकालावर परिणाम होऊ शकतो.
