लोणी काळभोर, ता. 29 : मांजरी बुद्रुक (ता. हवेली) येथील झेड कॉर्नर परिसरात भरदिवसा दुचाकीवरून आलेल्या चोरट्याने महिलेच्या गळ्यातील सोन्याचे मंगळसूत्र हिसकावून नेल्याची घटना 27 ऑगस्ट रोजी दुपारी दोनच्या सुमारास घडली. या घटनेत सुमारे1 लाख 20 हजार रुपये किमतीचे 9.430 ग्रॅम वजनाचे मंगळसूत्र चोरीला गेले आहे.
याप्रकरणी मीना महेशचंद्र नयनवाल (वय 52, रा. नीलाद्री इन्क्लेव्ह, मांजरी बुद्रुक) यांनी मांजरी पोलीस ठाण्यात तक्रार दिली आहे. त्यानुसार अज्ञात चोरट्यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, नयनवाल या खरेदी करून किराणा व भाजीपाला घेऊन पायी घरी जात होत्या. त्या बालाजी किराणा दुकानाजवळ आल्या असता समोरून दुचाकीवर आलेल्या अनोळखी व्यक्तीने अचानक त्यांच्या गळ्यातील सोन्याचे मंगळसूत्र जोरात ओढले आणि दुचाकीवरून मांजरी बुद्रुकच्या दिशेने पसार झाला.
चोरट्याने हेल्मेट व जीन्स परिधान केली होती आणि पाठीवर बॅग होती. दुचाकीचा क्रमांक तक्रारदारांना समजू शकला नाही. घटनेनंतर मांजरी पोलिसांनी अज्ञात दुचाकीस्वाराविरुद्ध गुन्हा दाखल केला आहे. पुढील तपास पोलीस हवालदार प्रदीप सोनवणे करीत आहेत.
