उत्तरप्रदेश : ग्रेटर नोएडा येथील रबुपुरा पोलीस ठाण्याच्या हद्दीतील नगला श्रीपदम गावात महेश, त्यांची पत्नी ललिता आणि त्यांची तीन मुले अशा एकाच कुटुंबातील पाच जणांचे मृतदेह त्यांच्याच घरात मृतावस्थेत आढळले. या भीषण घटनेमुळे परिसरात मोठी खळबळ उडाली आहे.सुरुवातीला आदल्या रात्री चहा आणि नूडल्स खाल्ल्यामुळे अन्नातून विषबाधा झाल्याची प्राथमिक चर्चा सुरू होती.मात्र या प्रकरणात महत्वाची माहिती समोर आली आहे.
या प्रकरणाच्या तपासादरम्यान पोलिसांच्या हाती एक महत्त्वाची व्हॉइस नोट लागली आहे. मृत महेशच्या मोबाईलमधून ही ऑडिओ क्लिप सापडली असून, त्यामध्ये त्याने आपल्या दोन बहिणी आणि एका मेहुण्याला कुटुंबाच्या वाईट परिस्थितीसाठी थेट जबाबदार धरल्याची माहिती समोर आली आहे. या ऑडिओ क्लेमुळे तपासाला एक नवीन वळण मिळाले आहे.
तसेच शवविच्छेदनादरम्यान शरीरात विषबाधेची चिन्हे आढळल्यामुळे डॉक्टरांनी पाचही जणांच्या अंतर्गत अवयवांचे नमुने फॉरेन्सिक तपासणीसाठी सुरक्षित ठेवले आहेत. हे अहवाल आल्यानंतरच मृत्यूचे नेमके कारण स्पष्ट होईल, असे पोलिसांनी स्पष्ट केले आहे. त्यामुळे केवळ खाण्यामुळे मृत्यू झाल्याचा अंदाज बांधणे सध्या घाईचे ठरेल.
तसेच, महेशच्या दुसऱ्या मेहुण्याने पोलिस ठाण्यात तक्रार दाखल करत संबंधित तिघांवर सतत छळ करत असल्याचा गंभीर आरोप केला आहे. या तक्रारीच्या आधारे पोलिसांनी तातडीने कारवाई करत त्या तिन्ही संशयितांना ताब्यात घेतले असून त्यांच्याविरोधात गुन्हा नोंदवला आहे. मात्र, या संशयितांचा आणि या सामूहिक मृत्यूचा नेमका काय संबंध आहे, याचा तपास सध्या सुरू आहे.
प्राथमिक तपासात बऱ्याच काळापासून चाललेला मालमत्तेचा वाद आणि तीव्र मानसिक तणाव यांमुळे हे पाऊल उचलले गेल्याची दाट शक्यता वर्तवली जात आहे. मात्र, हा मृत्यू नेमका आत्महत्येमुळे झाला की यामागे दुसरे काही कारण आहे, हे फॉरेन्सिक अहवाल आल्यावरच समोर येईल. पोलीस या प्रकरणाचा कसून तपास करत आहेत.
