Political News : पुण्यानंतर आता पिंपरी-चिंचवडमध्येही शरद पवार आणि अजित पवार यांच्या राष्ट्रवादीची होऊ घातलेली युती फिस्कटल्याचं चित्र समोर आलं आहे. विशेष म्हणजे आजच पिंपरी-चिंचवडमध्ये दोन्ही गटांमध्ये युतीसाठी सकारात्मक चर्चा झाली होती. शरद पवार गटाचे नेते अमोल कोल्हे आणि अजित पवार यांच्यात ही बैठक झाली होती. या चर्चेनंतर दोन्ही राष्ट्रवादी एकत्र येतील, अशी जोरदार चर्चा सुरू झाली होती. (political news)
मात्र अवघ्या काही तासांतच ही शक्यता मावळल्याचं दिसत आहे. पुण्यानंतर आता पिंपरी-चिंचवडमध्येही दोन्ही राष्ट्रवादी वेगवेगळ्या लढण्याचीच शक्यता जास्त असल्याचं बोललं जात आहे. त्यामुळे या दोन्ही शहरांमधील राजकीय गणितं पुन्हा एकदा बदलण्याची चिन्हं आहेत.
दरम्यान, पिंपरी-चिंचवडच्या राजकारणात आता एक नवा ट्विस्ट पाहायला मिळू शकतो. कारण एकीकडे शरद पवार आणि अजित पवार गट एकत्र येण्याच्या हालचाली सुरू असतानाच, दुसरीकडे अजित पवार गटाची एकनाथ शिंदे यांच्या शिवसेनेसह युती होण्याची शक्यता पुढे येत आहे.
दोनच दिवसांपूर्वी भाजप आणि शिवसेना (शिंदे गट) एकत्र निवडणूक लढणार असल्याची घोषणा स्थानिक नेत्यांनी केली होती. पण या घोषणेला काही तास उलटत नाहीत, तोच शिवसेना आता राष्ट्रवादी काँग्रेस (अजित पवार गट) सोबत हातमिळवणी करण्याच्या तयारीत असल्याची चर्चा सुरू झाली आहे.
ही फक्त चर्चा नाही, तर स्थानिक पातळीवर प्रत्यक्ष बोलणी सुरू असल्याची माहिती समोर आली आहे. जागावाटपावरही सकारात्मक चर्चा झाली असून, लवकरच युतीबाबत अधिकृत घोषणा होण्याची शक्यता आहे, अशी माहिती शिवसेनेचे उपनेते इरफान सय्यद यांनी दिली आहे. त्यामुळे पिंपरी-चिंचवडच्या राजकारणात पुढे नेमकं काय घडणार, याकडे सगळ्यांचं लक्ष लागलं आहे.
