संतोष मुंडे
पुणे: राज्यात महापालिका निवडणुकीचे बिगुल वाजले असून पिंपरी-चिंचवड महानगरपालिकेची निवडणूक राष्ट्रवादी (शरद पवार) आणि राष्ट्रवादी अजित पवार (गट) एकत्र लढणार असल्याचे स्पष्ट झाले आहे. त्यानंतर पुणे महानगरपालिकेसाठीही दोन्ही राष्ट्रवादी एकत्र येणार का ? याकडे पुणेकरांचे लक्ष लागून होते. सोमवारी (ता. 29) दोन्ही पक्षांच्या वरिष्ठ नेत्यांमध्ये झालेल्या बैठकीत पुणे महानगरपालीकाही एकत्र लढण्याच्या निर्णयावर शिक्कामोर्तब झाले.
महानगर पालिका निवडणुकीच्या अनुषंगाने उमेदवारी अर्ज भरण्यासाठी दोनच दिवस बाकी आहेत. मात्र अजूनही उमेदवार निश्चित झालेले नसल्याने इच्छुकांची चांगलीच तारांबळ उडाल्याचे दिसून येत आहे. यामध्ये इच्छुक नाराज उमेदवारांकडून पक्षांतर केले जात आहे. या “आयाराम गयारामां”ची उमेदवारी मिळवण्यासाठी घालमेल होताना दिसून येत आहे. याच पार्श्वभूमीवर अजित पवारांनी राष्ट्रवादी कॉंग्रेसला जबर धक्का दिल्याचे दिसून येत आहे. शिवाजीनगर विधानसभा मतदार संघातील कॉंग्रेसचे नेते दत्ता बहिरट यांनी कॉंग्रेसचा हात सोडत घड्याळ हाती बांधले आहे.
दत्ता बहिरट यांनी 2024 ची विधानसभा कॉंग्रेसकडून लढवली होती. मात्र त्यांना या निवडणुकीत पराभवाचा सामना करावा लागला होता. आता महापालिका निवडणुकीच्या अनुषंगाने त्यांनी राष्ट्रवादी अजित पवार गटात प्रवेश केला आहे.
दरम्यान, सुरुवातीपासूनच दोन्ही राष्ट्रवादी पुण्यात एकत्र निवडणूक लढतील अशी माहिती समोर येत होती. त्यानंतर चर्चा फिस्कटल्याची माहिती समोर आली. मात्र दोन दिवसांपूर्वी राष्ट्रवादी शरद पवार गटाचे आमदार रोहित पवार आणि खासदार अमोल कोल्हे यांच्यात पिंपरी-चिंचवड महापालिकेची तसेच पुणे महापालिकेची निवडणूक एकत्र लढण्याबाबतची बैठक झाली होती. आमदार रोहित पवार आणि खासदार अमोल कोल्हे यांनी उपमुख्यमंत्री अजित पवारांची भेट घेतल्याने पुन्हा ह्या युतीच्या चर्चा सुरू झाल्या होत्या. त्यानंतर या चर्चांना स्वत: अजित पवार यांनीही दोन राष्ट्रवादी एकत्र येत निवडणुका लढणार असल्याची घोषणा केली.
या पार्श्वभूमीवर, सोमवारी( ता. 29) राष्ट्रवादी काँग्रेस शरदचंद्र पवार पक्षाचे नेते अंकुश काकडे आणि विशाल तांबे हे अजित पवारांच्या भेटीसाठी गेले होते. या बैठकीत पुणे आणि पिंपरी-चिंचवड महापालिकेच्या जागावाटप आणि उमेदवारांबाबत चर्चा झाल्याची माहिती समोर येत आहे. पुणे महानगरपालिकेत अजित पवार गट सरासरी 125 जागांवर तर शरद पवार गट 40 जागांवर लढेल, असे बोलले जात आहे.
राष्ट्रवादी शरद पवार पक्षाने थेट अजित पवारांसोबत युती केल्याने महाविकास आघाडीला जबर धक्का बसला आहे. यानंतर ठाकरे गटाच्या शिवसेनेचे पिंपरी-चिंचवड जिल्हाप्रमुख आणि माजी आमदार गौतम चाबुकस्वार यांनी शरद पवार गटावर कडवट टीका केली आहे. “पिंपरीमध्ये शरद पवारांच्या राष्ट्रवादीने मविआला धोका दिला,” असा गंभीर आरोप महाविकास आघाडीकडून करण्यात आला आहे.
वंचित बहुजन आघाडीचे नेते प्रकाश आंबेडकर यांनीही या पर्श्वभीवर खोचक टोला लगावला आहे. “काका-पुतण्या एकत्र आले म्हणजे हे भाजपसोबत जाण्याचे पाहिले पाऊल आहे.” असं प्रकाश आंबेडकर यांनी म्हटलं आहे.
महानगर पालिका निवडणुकीच्या पार्श्वभूमीवर दोन्ही राष्ट्रवादी एकत्र आल्याने पुण्याच्या राजकारणात नाट्यमय स्थित्यंतर होत आहे. ही युती किती प्रभावी ठरते याकडे पुणेकरांचे लक्ष लागुन आहे.
