Chakan Farmers News : चाकण : उन्हाळ्यात कलिंगडाला मोठी मागणी राहते, त्यामुळे शेतकऱ्यांना चांगला दर मिळेल अशी अपेक्षा असते. मात्र यंदा परिस्थिती उलट दिसत असून बाजारात कलिंगडाचे दर मोठ्या प्रमाणात घसरले आहेत. महिनाभरापूर्वी 22 ते 25 रुपये प्रति किलो दराने विकले जाणारे कलिंगड सध्या केवळ 5 ते 10 रुपये प्रति किलो दराने विकले जात आहे. त्यामुळे शेतकरी आर्थिक अडचणीत सापडले आहेत.
मिळालेल्या माहितीनुसार, यंदा हवामान अनुकूल राहिल्यामुळे कलिंगडाचे उत्पादन मोठ्या प्रमाणात झाले आहे. परंतु अपेक्षित मागणी न झाल्याने बाजारात पुरवठा वाढला आणि दर कमी झाले. स्थानिक बाजारपेठा तसेच कृषी उत्पन्न बाजार समित्यांमध्ये मोठ्या प्रमाणात कलिंगडाची आवक होत असल्याने दरावर दबाव वाढला आहे. परिणामी अनेक शेतकऱ्यांना उत्पादन खर्चही निघत नाही.
कलिंगडाच्या शेतीत सुपर शुगर, अरका ज्योती, किरण, शुगर बेबी आणि ऑगस्टा सिम्बा अशा विविध जातींची लागवड केली जाते. प्रत्येक जातीचा दर्जा वेगळा असला तरी यंदा सर्वच प्रकारचे उत्पादन वाढल्याने दरात घसरण झाली आहे. महाराष्ट्रातून कलिंगड गुजरात, दिल्ली, हरियाणा, पंजाब, बंगाल, कर्नाटक आणि मध्य प्रदेश या राज्यांमध्ये मोठ्या प्रमाणात पाठवले जाते. मात्र यंदा इतर राज्यांमध्येही उत्पादन वाढल्यामुळे बाहेरील मागणी कमी झाली आहे.
वाहतूक खर्च आणि इंधन दर वाढल्यामुळे शेतकऱ्यांच्या अडचणीत आणखी भर पडली आहे. अलीकडे झालेल्या अवकाळी पावसाचाही विक्रीवर परिणाम झाला आहे. काही ठिकाणी मालाची गुणवत्ता कमी झाल्याने दर आणखी घसरले आहेत.
कलिंगडाच्या लागवडीसाठी बियाणे, खत, मजुरी आणि पाण्यावर मोठा खर्च होत असताना सध्याच्या दरात शेतकऱ्यांना गुंतवणूकही परत मिळत नाही. त्यामुळे काही शेतकरी माल बाजारात न नेता शेतातच टाकत असल्याचे चित्र आहे. या पार्श्वभूमीवर शासनाने हस्तक्षेप करून मदत करावी, अशी मागणी शेतकरी करत आहेत.
