पुणे: पुणे मेट्रोच्या पीसीएमसी-निगडी आणि स्वारगेट-कात्रज या मार्गिकांच्या प्रस्तावित विस्तारीकरणाला मान्यता मिळाली आहे. यासाठी लवकरच १२ नवीन मेट्रो ट्रेन खरेदी करण्यात येणार आहेत. प्रत्येक ट्रेनसाठी ३ डब्यांचा समावेश असेल. यामुळे पुणे मेट्रोच्या एकूण ताफ्यातील गाड्यांची संख्या ४६ वर जाणार आहे.
महामेट्रोने या खरेदीसाठी ‘टीटागढ रेल सिस्टिम लिमिटेड’ आणि ‘टीटागढ फिरेमा’ या कंपन्यांना एकत्रितपणे ऑर्डर दिली असून, एकूण ४३०.५३ कोटी रुपयांचा करार करण्यात आला आहे. या ट्रेन पूर्णतः ‘मेक इन इंडिया’ मोहिमेअंतर्गत तयार केल्या जाणार असून, यापूर्वीच्या ट्रेनप्रमाणे अल्युमिनियम बॉडी वापरून बनवण्यात येणार आहेत.
विस्तारित मार्गासाठी सज्ज मेट्रो
पीसीएमसी ते निगडी या मार्गिकेचे काम सध्या वेगाने सुरू असून, स्वारगेट ते कात्रज या मार्गासाठी लवकरच ठेकेदारांची नेमणूक होणार आहे. हे दोन्ही मार्ग पूर्ण झाल्यानंतर त्वरित मेट्रो सेवा सुरू करता यावी यासाठी ही नव्या ट्रेन खरेदीची प्रक्रिया राबवली जात आहे.
पुढील ३० महिन्यांत गाड्यांची टप्प्याटप्प्याने भर
या १२ मेट्रो ट्रेन पुढील ३० महिन्यांत टप्प्याटप्प्याने पुणे मेट्रोच्या ताफ्यात दाखल होतील. या सर्व गाड्या सध्याच्या मेट्रो ट्रेनप्रमाणेच पूर्णतः वातानुकूलित, स्वयंचलित दरवाजे, उद्घोषणा यंत्रणा, डिजिटल डिस्प्ले आदी सुविधांनी युक्त असतील
महामेट्रोचे व्यवस्थापकीय संचालक श्रावण हर्डीकर यांनी सांगितले, “पीसीएमसी ते निगडी या मार्गासाठी आवश्यक असलेल्या १२ नवीन मेट्रो ट्रेनसाठी महामेट्रोने ऑर्डर दिली आहे. यामुळे बांधकाम पूर्ण झाल्यावर तत्काळ मेट्रो सेवा सुरू करता येणार असून, प्रवाशांना त्याचा थेट लाभ मिळेल.”
ही विकास योजना पूर्ण झाल्यानंतर पुणेकरांना मेट्रोसेवेचा अधिक व्यापक आणि सुलभ अनुभव मिळणार असून, वाहतूक कोंडी कमी होण्यास मोठा हातभार लागणार आहे.
