Pimpri Chinchwad News : पिंपरी : दिवाळीचा सण मोठ्या धुमधडाक्यात साजरा होत आहे. लक्ष्मीपूजनानंतर रविवारी शहर, उपनगरात मोठ्या प्रमाणावर केलेल्या आतषबाजी करण्यात आली. त्यामुळे शहरातील विविध १८ ठिकाणी आगीच्या घटना घडल्या. त्यामध्ये सर्वाधिक घटना घरांना आगी लागण्याच्या आहेत. ११ ठिकाणी घरांना आग लागल्याच्या घटना घडल्या. अग्निशमन विभागाच्या सतकर्तेमुळे मोठा अनर्थ टळला.
कुठे आगीच्या घटना घडल्या
जुनी सांगवी, पिंपळे सौदागर, वाकड, फुगेवाडी, कासारवाडी, काळेवाडी, भोसरीतील पहिल्या मजल्यावरील घराला आग लागली होती. रावेत येथे एका दुकानाला आग लागली. चिखलीत चौथ्या मजल्यावरील घराला आग लागली. वडमुखवाडीत सलूनच्या दुकानाला आग लागली. आकुर्डी, एम्प्यायर इस्टेट येथील सातव्या मजल्यावरील घराला आग लागली. पिंगळेसौदागर येथे झाडाला आग लागली होती. मोरवाडीत घराला तर मोशीत एका कंपनीला आग लागली. पिंपरी बाजारपेठेतील एका कपड्याच्या दुकानाला आग लागली. दापोडीत एका घराला आग लागली होती. सुदैवाने यामध्ये कोणतीही दुर्घटना घडली नाही. अग्निशमन विभागाच्या सतकर्तेमुळे मोठा अनर्थ टळला.सातत्याने येणाऱ्या वर्दीमुळे अग्निशमन विभागाच्या जवानांची मात्र मोठी धावपळ झाली.
दिवाळीनिमित्त नाकानाक्यावर फटाक्यांची जोरदार आतषबाजी केली जात आहे. न्यायालयाच्या आदेशाकडे दुर्लक्ष करत दिवसभर-रात्रभर फटाके फोडले जात आहेत. लक्ष्मीपूजन झाल्यानंतर मोठ्या प्रमाणात फटाके फोडले जातात. रविवारी रात्री लक्ष्मीपूजनानंतर शहरासह उपनगरांमध्ये मोठ्या प्रमाणात फटाक्यांची आतषबाजी करण्यात आली. या आतषबाजीमुळे शहरातील १८ ठिकाणी आगीच्या घटना घडल्या.
