Pimpari Chinchwad Crime | पिंपरी चिंचवड : शहरातील चऱ्होली बुद्रुक येथून गोळीबाराची घटना समोर आली आहे. सराईत गुन्हेगार असलेल्या एकाने पूर्ववैमनस्यातून एका हार फुले विक्रेत्यावर गोळीबार करुन जीवे मारण्याचा प्रयत्न केल्याची घटना दिघीमध्ये घडली आहे. या घटनेनंतर एकच खळबळ उडाली आहे.
गोळीबाराचा हा थरार शनिवारी (दि.18) रात्री साडे बाराच्या सुमारास चऱ्होली बु. येथील बाआरटी काटे कॉलनी, चोविसावाडी येथे घडला. गोळीबार केल्यानंतर आरोपी घटनास्थळावरुन पसार झाले आहेत. या घटनेची माहिती मिळताच पोलिसांनी घटनास्थळी धाव घेतली.
याप्रकरणी सिद्धेश सिताराम गोवेकर (वय-28 रा. पद्मावती मंदिराशेजारी, वडमुखवाडी, चर्होली, बु.) यांनी दिघी पोलीस ठाण्यात फिर्याद दिली आहे. पोलिसांनी हरीओम पांचाळ (वय-20 रा. वडगाव रोड, आळंदी देवाची, ता. खेड) आणि त्याच्या एका साथीदारावर गुन्हा दाखल केला आहे.
पोलिसांनी दिलेल्या माहितीनुसार, सिद्धेश गोवेकर आणि आरोपी हरीओम पांचाळ हे एकमेकांच्या ओळखीचे होते.पूर्वी ते एकत्र असताना त्यांच्यात वाद झाले होते. शनिवारी रात्री सिद्धेश हा त्याच्या केटीएमवरून आळंदी येथून घरी जात होता. त्यावेळी आरोपीने त्याच्या गाडीचा पाठलाग केला.
बीआरटी काटे कॉलनी बस स्टॉपजवळ सिद्धेश आला असता आरोपी पांचाळ याने जुन्या भांडणाचा राग मनात धरून फिर्यादीच्या दिशेने पिस्तूल रोखून दोन गोळ्या झाडल्या. यामध्ये सिद्धेश थोडक्यात बचावला. पुढील तपास पोलीस करत आहेत.
